Քաղաքական

Փոքր, սակայն ճիշտ ուղղությամբ քայլ՝ քաղաքագետները՝ սանկտպետերբուրգյան հանդիպման մասին

annanazaryan

Ինչպես են գնահատում Սարգսյան-Ալիև- Պուտին հանդիպումը Երևանում: Կարծիքները խիստ տարբեր են: Մի մասը գտնում է որ  հանդիպումը դրական քայլ էր, որոշ քաղաքագետներ էլ Հայաստանի վրա ճնշումներ գործադրելու միտումներ են նկատել հանդիպման ու համատեղ հայտարարության մեջ:

 

Սանկտպետերբուրգյան  հանդիպումից  հետո քաղաքագետները փորձում են հասկանալ, թե  ինչ զարգացումներ կարող են տեղի ունենալ ԼՂ հակամարտության գոտում:  Հրանտ Մելիք- Շահնազարյանի համոզմամբ՝ համատեղ հայտարարությունն արդեն դրական  դինամիկայի մասին է վկայում:  Վիեննայից հետո պետք է անցնել հաջորդ քայլին: Եթե Ալիևի խոսքն ու գործը համընկնում են,  ապա հրադադարը կպահպանվի՝ ասաց քաղաքագետը: «Մնում է իրագործել դիտորդների  թվաքանակի ավելացման ու հետաքննության մեխանիզմների ներդրման հարցերում պայմանավորվածությունները»,- ասում է։

Բաքուն  մտածում էր, թե կարող է պատերազմի միջոցով լուծել հարցը, բայց պարզվեց,  որ  չի կարող:  Շատերի մոտ տպավորություն է գործել Ալիևի դեմքի արտահայտությունը: Շատերն ուրախություն, ինքնագոհություն են նկատել նրա դեմքին, մինչդեռ Հրանտ Մելիք-Շահնազարյանն Ալիևի դեմքին ոչ ադեկվատ դիմախաղ է արձանագրել:

Իսկ ե՞րբ Արցախը կդառնա բանակցային կողմ՝ ժամանակի հարց է՝ ասում է ու շարունակում՝ դրանից բանակցությունների ողջ տրամաբանությունը կփոխվի:

Թուրքագետ Ռուբեն Սաֆրաստյանը սանկտպետերբուրգյան հանդիպումը գնահատեց փոքր , սակայն  ճիշտ ուղղությամբ քայլ: «Դիտորդների թվի ավելացման դեպքում  հարց է, թե ով է ֆինանսավորելու, ինչպես է լինելու: Մի փոքր քայլ է արվել ու սպասենք, հույս ունենանք, որ քայլերն այս ուղղությամբ ավելի  հստակ կլինեն: Բայց պետք է նաև հիշել, որ գործ ունենք անկանխատեսելի հակառակորդի հետ»։

Բաքուն իր համար ռազմական ճանապարհով խնդրի լուծումն ուղղություն է ընտրել և նպատակ ունի վիժեցնել խնդրի խաղաղ կարգավորումը, այնպես որ դժվար է խոսել դրական փոփոխությունների մասին: Հանդիպման նախաձեռնողը Մոսկվան է: ՌԴ- ն ուզում է, որ Ադրբեջանը հայացքն ուղղի դեպի ԵԱՏՄ, բայց Բաքուն չի գնա այդ քայլին, քանի որ չի կարող սահմանափակել նավթի ու գազի իր շահույթները:

ՀՅԴ Հայ դատի ու քաղաքական հարցերի գրասենյակի պատասխանատու Կիրո Մանոյանին հույս չի ներշնչել հանդիպումը: Համատեղ հայտարարությունը վկայում է, որ մի քանի բանի մասին է խոսվել ու ժամանակ է հարկավոր տեսնելու, թե որքանով են դրանք իրականանալի:  Նա լուրջ մտահոգություններ ունի ապագայում խնդրի կարգավորման հարցում։ « Երբ բանակցությունները սկսվեն՝ կարծում եմ ՀՀ վրա ճնշումներ կսկսվեն : Առանց բոլոր սկզբունքների շուրջ  վերջնական համաձայնության՝ կարող են սկսել համապարփակ համաձայնագրի շուրջ մշակումները, իսկ դա վատ հետևանքներ կարող է ունենալ»։

Դա ամբողջությամբ կփոխի բանակցային գործընթացի տրամաբանությունը ու կնշանակի անցում խնդրի կարգավորման փուլային տարբերակի՝ հոռետեսորեն նկատեց Կիրո Մանոյանը:

Back to top button