Հասարակություն

Տեղի ունեցավ զորակոչի հետ կապված դիմում- բողոքները քննող հանձնաժողովի անդրանիկ նիստը

alisagevorgyan

Զորակոչի ընթացքում քաղաքացիներից  ստացված դիմումների և բողոքների քննարկման նպատակով ստեղծված  հանձնաժողովի նիստերը կանցկացվեն յուրաքանչյուր երկուշաբթի և հինգշաբթի օրերին՝ Երևանի Մոսկովյան 5 հասցեում : Հանձնաժողովի առաջին նիստը գումարվել է այսօր:

 

Գեղամ Դոլուխանյանը մեկն է այն ծնողներից , ում դիմումն այսօր քննարկվում էր ՊՆ քաղաքացիների դիմումների և բողոքների քննարկման նպատակով ստեղծված  հանձնաժողովի նիստում: Պաշտպանության նախարարին առընթեր հասարակական խորհրդի նախագահ Գեղամ Հարությունյանի փոխանցմամբ՝  հանձնաժողովի անդրանիկ նիստում այսօր քննարկվել են շուրջ 30 դիմում-բողոքներ՝ ամենատարբեր բովանդակությամբ

Մինչ օրս ստացվել են շուրջ 70 դիմում-բողոքներ, որոնք պետք է քննարկվեն մինչև հուլիսի մեկը, այսինքն՝ ամառային զորակոչը: «Դիմումատու ծնողները, իհարկե, ունեն իրենց պատկերացումներն ու գնահատականները, որոնք երբեմն կիսում ենք, երբեմն՝ ոչ»,- ասում է  հասարակական խորհրդի նախագահը: Ըստ նրա՝ հանձնաժողովի աշխատանքի հիմնական սկզբունքներից մեկն այն է, որ քննարկումներն անցկացվում են դիմումատուների և զորակոչիկների մասնակցությամբ, ինչը հնարավորություն է տալիս լիարժեք խորամուխ լինել հարցերի էության մեջ:

«Զինվորի մայր» ՀԿ նախագահ Անանհիտ Հովնանյանը ևս ընդգրկված է հանձնաժողովի աշխատանքներում: Նա ցավով է արձանագրում, որ դիմումների ճնշող մեծամասնությունն առնչվում են երիտասարդների առողջական խնդիրներին։

Հավելենք , որ  զորակոչի ընթացքում քաղաքացիներից  ստացված դիմումների և բողոքների քննարկման նպատակով ստեղծված  հանձնաժողովի նիստերը կգումարվեն յուրաքանչյուր երկուշաբթի և հինգշաբթի օրերին՝ Երևանի Մոսկովյան 5 հասցեում :

Back to top button