Պտղով պայմանավորված հղիությունների ընդհատումը շարունակում է մտահոգել ոլորտի մասնագետներին, ովքեր բազմիցս ահազանգում են դրա և՛ վիճակագրության, և՛ կնոջ առողջության վրա վտանգավոր ազդեցության մասին: Աբորտները պետք է կատարվեն միայն բժշկական ցուցումներով, այսինք՝ երբ կա հիվանդ երեխա ունենալու վտանգ, կամ կնոջն արգելվում է ծննդաբերել նրա մոտ առկա խնդիրներից ելնելով: Բազմաթիվ քայլերը, որոնք ուղղված են խնդրի լուծմանը, գինեկոլոգ Գեորգի Պողոսյանը համարում է ոչ արդյունավետ: Բժիշկը պետք է լինի բարեխիղճ և աբորտի եկած կնոջը կարողանա համոզել՝ չգնալ այդ քայլին:
Վիճակագրությունը փաստում է, որ Հայաստանում վերջին տարիներին տղաներն ավելի շատ են ծնվում, քան՝ աղջիկները: Հայաստանում տարեկան շուրջ 1400 աղջիկ չի ծնվում. հղիությունն ընդհատվում է միայն նրանց սեռի պատճառով: Գինեկոլոգ Գեորգի Պողոսյանը նշում է, որ հղիության ընդհատումները վտանգավոր են այնքան, որքան վիրահատական յուրաքանչյուր միջամտություն: Հղիության ընդհատումները պետք է կատարվեն միայն բժշկի ցուցումներից ելնելով: Սակայն այսօր հղիություններն ընդհատվում են տարբեր պատճառներով՝ սեռով պայմանավորված կամ արտաամուսնական հղիությունը: Ճիշտ է՝ բազում քայլեր ձեռնարկվում են խնդրի լուծման ուղղությամբ, սակայն արգելքի ճանապարհները, ըստ մասնագետի, արդյունավետ չեն:
Գինեկոլոգը խնդրի դեմ պայքարն առաջին հերթին տեսնում է բժիշկների կողմից: Նրանք պետք է չթողնեն ընդհատել առաջին հղիությունը, բացատրեն, որ այն իր հերթին բերում է շատ բարդություններ: Օրինակ՝ օրգանիզմն ապրում է սթրես, զարգանում են բորբոքային հիվանդություններ, նկատվում են էնդոկրին համակարգի խախտումներ: Մասնագետն առաջարկում է զարգացնել հակաբեղմնավորիչների կիրառումը, չնայած դրանք էլ անվտանգ չեն: Սակայն հղիության ընդհատումների հետ համեմատած՝ բժշկի խորհրդով ավելի նախընտրելի է.
Փաստաբան Մարինե Ֆարմանյանն էլ է կարծում, որ հղիության ընդհատման ուղղված արգելող քայլերը կարող են մյուս կողմից մեծացնել մայրական մահացության դեպքերը, քանի որ կանայք հղիության ընդհատման կարող են դիմել տան պայմաններում՝ առանց բժշկի հսկողության: «Միանգամից կտրականապես իրավական արգելքի տակ դնել աբորտը` օրենսդրական նման կարգավորում տալով, կարող է շատ լուրջ խնդիրների հանգեցնել»:
Գինեկոլոգը շեշտում է՝ ինչ կատարվում է բնությանը դեմ՝ չի կարող մնալ անհետևանք:
