Հունիսի 21-ը ՄԱԿ-ի գլխավոր ասամբլեան հայտարարել է Յոգայի միջազգային օր: Այդ օրը միջոցառումներ կկազմակերպվեն աշխարհի 192 երկրներում, նաև` Հայաստանում: Ինչպես նախորդ տարի, այս տարի ևս Թումոյի այգում կանցկացվեն յոգայի վարժություններ և հետաքրքվողները կարող են մասնակցել միջոցառմանը:
Ինչպես Հայաստանում Հնդկաստանի դեսպան Յոգեշվար Սանգվան է ասու՝ յոգան մարդուն փոխանցում է ոչ միայն ֆիզիկական առողջություն, այլև հոգևոր ներդաշնակություն:
ԵՊԲՀ-ի ռեկտոր, թոքաբան Միքայել Նարիմանյանը մատնանշում է յոգայի բժշկական կարևոր հատկանիշները: Ըստ նրա՝ շնչառական հատուկ վարժությունների միջոցով հնարավոր է կարգավորել օրգանիզմի խանգարված ֆունկցիաները: «Ամեն ինչ արվում է շնչական ֆունկցիան հսկողության տակ վերցնելու միջոցով: Շնչական գիմնաստիկան, վարժությունները, շնչական ֆունկցիան կառավարելու միջոցով մարդը հասնում է ներդաշնակության: Ոչ մի վեգետատիվ ֆունկցիա չի կառավարվում կամքի կամ գիտակցության կողմից, միայն շնչառությունը: Դուք շնչառությունը կարող եք արագացնել, կարող եք զսպել և դրա միջոցով կարող եք ազդել այլ ֆունկցիաների վրա: Դրանով դադարեցնել սիրտխփոցը, վերականգնել ստամոքսի ֆունկցիան: Այդ առումով յոգան չափազանց արդյունավետ է»,- ասում է թոքաբանը։
