ԿարևորՀասարակություն

ՀՀ-ում հուլիսի 1-ից բնակիչների համար գազը կէժանանա

Հանրային ծառայությունները կարգավորող հանձնաժողովի՝ այսօրվա նիստում գազի գնի նվազեցման վերաբերյալ որոշում կայացվեց:

Ըստ այդմ,  ամսական մինչև 10,0 հազար խորանարդ մետր սպառում ունեցող սպառողներին վաճառվող յուրաքանչյուր հազար խորանարդ մետր բնական գազի սակագինը սահմանվեց  146 700 դրամ՝ ներառյալ ավելացված արժեքի հարկը:

Ամսական 10,0 հազար խորանարդ մետր և ավելի սպառում ունեցող սպառողներին վաճառվող յուրաքանչյուր հազար խորանարդ մետր բնական գազի` յուրաքանչյուր ամսվա սակագնի հաշվարկման հետևյալ բանաձևը` P = 257.56 * E,

որտեղ` P-ն 10,0 հազար խորանարդ մետր և ավելի սպառում ունեցող սպառողներին վաճառվող բնական գազի յուրաքանչյուր հաշվետու ամսվա սակագինն է (դրամ/հազար խորանարդ մետր)՝ ներառյալ ավելացված արժեքի հարկը,
E-ն յուրաքանչյուր հաշվետու ամսվան նախորդող ամսվա 25-ին Հայաստանի Հանրապետության կենտրոնական բանկի կողմից հրապարակված մեկ ԱՄՆ դոլարի նկատմամբ հայկական դրամի` արժութային շուկաներում ձևավորված միջին փոխարժեքի մեծությունն է։

Հիշեցնենք, որ  հանձնաժողովի գործող որոշման համաձայն՝ ամսական մինչև 10 հազար խմ սպառում ունեցող սպառողներին վաճառվող յուրաքանչյուր հազար խմ  բնական գազի սակագինը սահմանված է 156 700 դրամ՝ ներառյալ ԱԱՀ-ն:

Նիստում կայացրած մեկ այլ  որոշմամբ ,սահմանվեց «Գազպրոմ Արմենիա» փակ բաժնետիրական ընկերության կողմից՝

1) գազամատակարարման համակարգի օպերատորի ծառայության մատուցման սակագինը՝ 20.892 դրամ` առանց ավելացված արժեքի հարկի և 25.07 դրամ` ներառյալ ավելացված արժեքի հարկը, ներկրված յուրաքանչյուր հազար խորանարդ մետր բնական գազի համար,
2) բաշխված յուրաքանչյուր հազար խորանարդ մետր բնական գազի բաշխման սակագինը`22455.908 դրամ` առանց ավելացված արժեքի հարկի և 26947.089 դրամ` ներառյալ ավելացված արժեքի հարկը։

Back to top button