Ապրիլյան ռազմական գործողությունների ժամանակ Ադրբեջանի կողմից թույլ տրված ռազմական հանցագործությունները լրագրողներն ու իրավաբանները պատրաստվում են վիճարկել միջազգային ատյաններում: Առայժմ լրագրողներն զբաղված են փաստերի հավաքագրմամբ, իրավաբանները՝ դրանց վերլուծությամբ ։
Նպատակն է, որ միջազգային հանրությունը իմանա, թե ինչ է տեղի ունեցել ապրիլյան քառօրյա ռազմական գործողությունների ժամանակ, ինչը թերևս կկաշկանդի հակառակորդին կրկնել նման վայրագությունները՝ համոզմած է «Մեդիա և իրավունք» հ/կ նախագահ Լիլիթ Լալայանը:
Կատարվածը բացի քաղաքականից պետք է ունենա նաև իրավական հետեւանքներ՝ համոզված է փաստաբան Նիկոլայ Բաղդասարյանը: Իրավական լուծման համար դիտարկվում է և Միջազգային քրեական դատարան, և Մարդու իրավունքների եվրոպական դատարան դիմելու հնարավորությունը։
Փաստաբանը կարծում է, որ Ադրբեջանի ռազմական հանցագործությունները միջազգային դատական ատյաններ ներկայացնելու գործընթաց մենք պետք է սկսեինք դեռ 1994 թվականին։ Մինչեւ միջազգային ատյաններ դիմելը, սակայն, նրանք կոչ արեցին լրատվամիջոցներին փաստեր տրամադրել:
Պատրաստվում են նաև դիմել միջազգային լրատվամիջոցներին , որպեսզի նրանք, ովքեր լուսաբանել են ապրիլյան գործողությունները՝ ներկայացնեն իրենց ձեռքի տակ եղած ապացույցները։
