Խորհրդարանը շարունակում է քննարկել Վերահսկիչ պալատի 2015 թվականի տարեկան հաշվետվությունը: Կառույցի նախագահ Իշխան Զաքարյանը պատասխանում է պատգամավորների հարցերին:
Տարեկան հաշվետվությամբ Վերահսկիչ պալատը ներկայացրել է 2015-ին իրականացված վերահսկողության արդյունքներն ու հայտնաբերված խախտումները: Դրանք ամփոփովել են 23 ընթացիկ հաշվետվություններում՝ ներառելով սոցիալական, գյուղատնտեսական, առողջապահության, էներգետիկայի, դատաիրավական ոլորտները, ինչպես նաեւ վարկային եւ դրամաշնորհային ծրագրերը: Հատկապես ռիսկային ՎՊ-ն համարել է սոցիալական ծառայությունների ոլորտը:
«Ժառանգություն» խմբակցության քարտուղար Թևան Պողոսյանն այսօր արձանագրել է, որ տարեցտարի ՎՊ հաշվետվության ծավալները նվազում են և հետաքրքրվել՝ արդյո՞ք սա նշանակում է, որ իրավիճակը բարելավվում է:
ՎՊ նախագահ Իշխան Զաքարյանը հաշվետվության ծավալի փոփոխությունը պայմանավորել է նոր մեթոդաբանության ընտրությամբ:
«Հաջորդ տարվա հաշվետվությունը կրկին պետք է նվազի, որովհետև մենք մոտենում ենք Ինտոսայի սկզբունքներին, որը չի պարտադրում ընթացիկ հաշվետվությունները ներառել տարեկան հաշվետվության մեջ: Այլապես, մեր հաշվետվություններն իրար հետ 2000 էջ և ավելի կկազմեն»:
