Ազգային ժողովի` այսօր մեկնարկած քառօրյայի օրակարգում Ընտրական օրենսգրքի նախագիծն է՝ հարակից փաթեթով: Այն առաջիկա 3 օրերի ընթացքում, ըստ կառավարության առաջարկի, պետք է քննարկվի և քվեարկվի միանգամից երկու ընթերցումներով: Այս շտապողականությունից պատգամավորները դժգոհել են: ՀԱԿ-ը արտահերթ նիստ հրավիրելու առաջարկ է արել, կառավարությունն այդ հնարավորությունը չի բացառել:
Ըստ փոփոխված Սահմանադրության՝ Ընտրական օրենսգրքի ընդունման վերջնաժամկետը հունիսի 1-ն է: Այսօր մեկնարկած քառօրյան միակն է մայիսի ընթացքում: Սա նշանակում է, որ Ընտրական օրենսգիրքը ՝ հարակից փաթեթով երկրորդ և երրորդ ընթերցումներով պետք է ընդունվի այս քառօրյայի ընթացքում: Հենց այդ պատճառով էլ կառավարությունը փաթեթը քննարկման է ներկայացրել հատուկ կարգով՝ երրորդ ընթերցումը երկրորդից 24 ժամ հետո ընդունելու պայմանով:
Պատգամավորենրը շտապողականության պատճառը հասկանում են, բայց դժգոհ են: Ընտրական օրենսգիրքը չի կարող շտապողականության մթնոլորտում ընդունվել ՝ ասում է ՀԱԿ խմբակցության ղեկավարը: «Շտապողականությունը, որ դրսևորվում է, պայմանավորված է Սահմանադրությամբ, սակայն չի կարելի թույլ տալ, որ այս կարևոր փաստաթուղթն ընդունվի շտապողականության մթնոլորտում: Մենք առաջարկում ենք, որ հենց հիմա հրապարակային երաշխիքներ տրվեն, որ երկրորդ ընթերցմամբ ընդունումից հետո արտահերթ նիստ կհրավիրենք, կքննարկենք մեր առաջակները և կոնսենսուսի խնդիրը»:
Պաշտոնական հավաստիացումը չուշացավ: Կառավարությունը արտահերթ նիստի հնարավորությունը չի բացառում՝ օրենսդրական փաթեթը երկրորդ ընթերցմամբ ներկայացնող Դավիթ Հարությունյանը վստահեցրեց. «Պաշտոնապես հայտարարում եմ՝ եթե կարողանանք կոնսենսուսի գալ , արտահերթ նիստ կհրավիրենք: Այո, մենք ենք խնդրել փաթեթը հատուկ կարգով քննարկել, քանի որ մինչև հունիսի 1-ն ընդունելու պահանջ կա: Եթե արտահերթ հրավիրվի, ապա երրորդ ընթերցմամբ քննարկում այս քառօրյայում չի կազմակերպվի»։
Կազմակերպականից բովանդակայինին անցենլով՝ Դավիթ Հարությունյանը պատգամավորներին մանրամասն ներկայացրեց, թե ստացված բազմաթիվ առաջարկություններից որոնք են ներառվել նախագծում: Տպավորությունն այնպիսին էր, որ նախագծում շատ բան փոփոխվել է, բայց նաև շատ առաջարկներ էլ չեն ընդունվել: Համենայն դեպս, առաջարկները չընդունելու մասով դժգոհության պակաս խորհրդարանում չկար:
Հրանտ Բագրատյանն օրինակ հայտարարեց, որ իր 2 տասնյակ առաջարկություններից 4-5-ը ՝ համեմատաբար թեթևները, մասամբ ընդունվել են, մյուսները հաշվի չեն առնվել: Արդյունքում՝ Բագրատյանի նախնական գնահատականներըև չեն փոխվել: «Ես դեմ եմ, սա տանում է դեպի ոչ մի տեղ, չի կարող հանգեցնել ոչ մի առաջընթացի: Ես կարծում եմ, որ ԱԺ-ն պետք է իր մեջ ուժ գտնի, որ չընդունի»։
ԲՀԿ-ն փոքր-ինչ այլ մոտեցում ունի. այս կամ այն առաջարկը ընդունել-չընդունելուց ավելի կարևորում է քաղաքական կամքի առկայությունը: Խմբակցության ղեկավար Նաիրա Զոհրաբյանը համոզված է, որ առանց դրա որևէ օրենսգիր՝ անգամ լավագույնը, ոչինչ չի փոխելու: «Եթե արդար ընտրություններ անցկացնելու կամքը չկա, ուզում է ձեր տասը մատը դնեք էլեկտրոնային սարքի վրա կամ մի մատը, կամ բոլոր քվեարկած ընտրացուցակները հրապարակեք, միևնույն է, ոչինչ չի փոխվելու»:
Նաիրա Զոհրաբյանն այսօր հայտարարեց նաև, որ 91-ից սկսած բոլոր իշխանություններն ապացուցել են, որ չեն ունեցել այդ կամքը: Ունի թե չունի այսօրվա իշխանությունը, տիկին Զոհրաբյանը ելույթում չասաց:
ՀԱԿ-ն էլ որոշակիորեն ԲՀԿ-ի հետ համաձայն չէ: Միևնույնն է, կարծում է, որ 5 հայտնի առաջարկները պետք է ընդունվեն: Դրանք վերջնագրեր չեն, տրամաբանված և իրացվելի առաջարկներ են՝ ասաց Արամ Մանուկյանը: «Եկեք ընդառաջ, որ էս նեղ վիճակից դուրս գանք, մի փոքր դրական շահաբաժին ստանանք հասրակությանից»:
Ավելի քան մեկ ամիս ձգվող քննարկումը ուղեկցվում է կոնսենսունսի փնտրտուքով: Այսօր ևս կողմերը խոսեցին դրա մասին: Այն դեռ չկա, բայց կարևորը , որ դրա հնարավորությանը թե ընդդիմությունը, թե իշխանությունը դեռ հավատում են: Արամ Մանուկյանն այսօր ընդառաջ քայլ համարեց արտահերթով հարցը քննարկելու կառավարության պատրաստակամությունը, Էդուարդ Շրմազանովն էլ քայլ համարեց Արամ Մանուկյանի հայտարարությունը: ԱԺ փոխնախագահւ որակական փոփոխություն է նկատում քաղաքական քննարկումներում: «Միասնական աշխատանքի արդյուքնում տեսնում ենք, որ դրական տեղածարժ կա: Մինչև Ընտրական օրենսգրքի քննարկումը բաժակը դատարկ էր , հիմա կիսով չափ լցրել ենք: Երկրորդ ընթերցումից հետո ավելի ենք լցնելու»:
Ընտրական օրենսգրքի քննարկումը խորհրդարանում կշարունակվի վաղը:
