Ինչպես խորհրդարանական ողջ քառօրյան, այնպես էլ այն ամփոփող ավանդական ճեպազրույցներն այսօր երկու առանցաքային թեմա են ունեցել՝ սահմանային իրավիճակ ու ընտրական օրենսգիրք: Քաղաքական ուժերը գիտեն, որ ընտրական օրենսգիրքն այսօր հանրությանը հուզող ամենակարևոր խնդիրը չէ, բայց նաև խոստովանում են, որ շահագրգիռ կողմ են ու ստիպված են քննարկել այն, քանի որ 2017-ին Հայաստանում խորհրդարանական ընտրություններ են նախատեսված: Ճեպազրույցների ժամանակ խոսվել է ոչ միայն ընտրական օրենսգրքի, այլ նաև քառօրյայի ընթացքում օրինագծերից մեկի տապալման, հանրապետության նախագահի ու հանրապետական պատգամավորների փակ հանդիպման մասին:
Հանրապետության նախագաhի և ՀՀԿ խմբակցության օրերս կայացած հանդիպումը կազմակերպվել է պատգամավորների խնդրանքով, Սերժ Սարգսյանը նոր մանրամասներ է ներկայացրել սահմանային իրավիճակի վերաբերյալ՝ այսօր խորհրդարանական ճեպազրույցների ժամանակ ասաց ՀՀԿ խմբակցության ղեկավար Վահրամ Բաղդասարյանը, ըստ էության, հերքելով լրատվամիջոցների այն վարկածը, թե հանդիպման ժամանակ պատգամավորները նախատինքի խոսքեր են լսել:
Փոխարենը ՀՀԿ խմբակցության ղեկավարը չհերքեց , որ հանդիպմանը քննարկվել է օրենսդրական աշխատանքում թերանալու հարցը: Առիթը «Հրազդան-ցեմենտ» գործարանին հարկային արտոնություններ տալու նախագծի տապալումն էր վերջին ընթերցմամաբ այս քառօրյայի ընթացքում: Վահրամ Բաղդարասրյանը սա ձախողում չի համարում, ասում է՝ պարզապես խորհրդարանական ընդդիմությունը օգտվեց իրավիճակից: «Նախագծի տապալումը ընդդիմության թուլությունն էր, որ ցույց տվեցին, թե իրենք էլ են կարողանում մի բան անել։ Հաշվեցին, որ ՀՀԿ-ականներից 12 հոգի սահմանին է, ՀՅԴ-ականները գործուղման են, և անակնկալի բերեցին: Բայց խնդիր չի, նորից կգա ԱԺ և կտեսնեք համախմբվածությունը և թե այդ բոյկոտողներից քանիսն են կողմ քվեարկում»:
Պատգամավորներից 98-ը երեկ կողմ քվեարկեց Ընտրական օրենսգիքն առաջին ընթերցմամբ ընդունելուն: Վահրամ Բաղդասարյանը սա արդեն կոնսեսնսուսի դրսևորում է համարում՝ արձագանքելով հարցին, թե ինչ քայլերի է պատրաստ իշխանությունը Ընտրական օրենսգրքի շուրջ փոխհամաձայնություն ձևավորելու համար: «98 կողմն արդեն կոնսենսուս է: Կա՞ր որևէ ֆրակցիա, որի կազմում կողմ քվեարկածներ չլինեն»:
ՀԱԿ-ից կողմ քվեարկել է միայն Լյուդմիլա Սարգսյանը: Խմբակցությունում, սակայն , կարևորում են ոչ թե կողմ ձայների քանակը, այլ այն, թե ինչպես կազմակերպվեց քվեարկությունը: Նման քայլերով կոնսենսուս չեն ձևավորում՝ ասում է Լևոն Զուրաբյանը ՝ երեկվա քվեարկությունը աճպարարություն որակելով: «Ընտրական օրենսգքրի քվեարկությունը կատարվեց ԱԺ կանոնակարգի կոպտագույն խախտումներով : Եվ անընդունելի են այն բացատրությունները, թե միևնույնն է արդյունքը նույնն էր լինելու: Նման քայլերով միասնականություն չեն հաստատում»:
ՀԱԿ-ում համոզված են, որ հնարավոր կոնսենսուսը պետք չէ թաղել, կարծում են այն ձևավորելու պատասխանատվությունը իշխանություններին է: Այս առիթով Լևոն Զուրաբյանն այսօր երկու ուղերձ հնչեցրեց՝ մեկը իշխանությունների համար, մյուսը՝ ընդդիմադիրների: Իշխանություններին սթափվելու և աճպարարություններից հրաժարվելու կոչ են անում, ընդդիմադիրներին հորդորում են փոխադարձ մեղադրանքներով չզբաղվել: «Այն, ինչ կատարվում էր երեկ, երբ ընդդիմությունը զբաղված էր փոխադարձ մեղադրանքներով, անընդունելի էր»:
Ընդդիմադիրների բաժանման կամ դասակարգման մասին երեկ խորհրդարանում խոսում էր ԲՀԿ խմբակցության ղեկավարը: Ճեպազրույցների ժամանակ արդեն ոչ թե Նաիրա Զոհրաբյանը, այլ Միքայել Մելքումյանը ԲՀԿ-ի դիրքորոշումն ամփոփեց. խմբակցությունում ընտրական օրենսգրքի նախագծի ավելի շատ կողմ են, քան՝ դեմ, կարծում են, որ փոխզիջումներ եղել են, փորձելու են աշխատել, որ հնարավորինս շատ առաջարկություններ ընդունվեն:
Ինչ վերաբերում է հնարավոր կոնսենսուսը չթաղելու հորդորին, ապա Մելքումյանը կարծում է, որ մեր իրողություններում լիակատար համախմբում կա միայն Ղարաբաղին ու նրա անվտանգությանն առնչվող հարցերում: Ընտրականի հարցում կոնսենսուսի գտնելը, Մելքումյանի կարծիքով, բավականին բարդ է: Հետևաբար որպես պրագմատիկ գործիչ ՝ անքանով-որքանով բանաձևն է առաջարկում: «Կոնսենսուսները հնարավոր են այնքանով, որքանով դրա համար պայմաններ կան: Ես որպես պրագմատիկ գործիչ միշտ այդ մոտեցմամաբ եմ առաջնորդվել»:
Խորհրդարանակն ուժերը պատրաստ են առաջնորդվել ոչ միայն պրագմատիզմով, այլ նաև ջենթլմենական համաձայնություններով: Առաջարկն արվել է դաշնակցական Աղվան Վարդանյանի կողմից ՝ ջենթմենական համաձայնության գալ, փաստաթուղթ ստորագրել ՝ ընտրությունների ժամանակ ընտրակաշառքներ չբաժանելու ու կեղծիքների չդիմելու մասին : Բոլորն առաջարկին, ասում են, կողմ են:
