«Ե՛վ ՀՀ նախագահի, և՛ ԱԳ նախարարի հայտարարությունից պարզ է դառնում, որ ապրիլյան չորսօրյա պատերազմը ԼՂՀ հիմնախնդրին վերաբերող բանակցությունները հետ մղեցին»,- այսօր լրագրողների հետ հանդիպման ժամանակ հատարարել է ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանը: Վերջինիս դիտարկմամբ, «Ադրբեջանը փորձում է այսօր ասել, որ զինադադարի ռեժիմն այլևս 1994 թվականի եռակողմ պայմանագիրը չէ, այլ երկկողմանի բանավոր պայմանավորվածությունը, որը ձեռք է բերվել Մոսկվայում: Ադրբեջանը փորձում է այս կռիվների միջոցով ընդհանրապես Լեռնային Ղարաբաղի Հանրապետությանը դուրս հանել հավանական բանակցություններից»,-հայտարարել է Կիրո Մանոյանը:
Ադրբեջանը դժգոհ էր եռակողմ բանակցային գործընթացից, որտեղ կա ժողովուրդների ինքնորոշման իրավունքի հարցը: «Նրանք փորձում են մեկնաբանել, թե ինքնորոշման իրավունքը կարող է լինել Ադրբեջանի սահմաններում, հետևաբար, իր բուն նպատակը բանակցություններն ու բանակցությունների միջավայրն ու ատյանը փոխելն է»,- ասել է ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանը:
Նրա խոսքով, հայկական կողմն անելիք ունի.«Այստեղ մենք անելիք ունենք, խաղաղ կարգավորում չի նշանակում, թե անպայման բանակցություններ պետք է լինեն»:
