տեղադրվել է ժամը 14։09- ին
վերջին լրացումը՝ ժամը 19։14- ին
Ստրասբուրգում շարունակվում է ԵԽԽՎ գարնանային նստաշրջանը: Լիագումար նիստերի երկրորդ օրը եվրոպացի պատվիրակներն սկսել են ԵՄ Եվրոպական հանձնաժողովի նախագահ Ժան-Կլոդ Յունկերի ելույթով, ապա լսել Թուրքիայի վարչապետին, որը Ստրասբուրգում է հատուկ հյուրի կարգավիճակով: Ահմեդ Դավութօղլուն խոսել է տարբեր թեմաների մասին, անդրադարձել նաև ղարաբայան հակամարտությանը: Ստատուս քվոյի պահպանումը Թուրքիան անընդունելի է համարում ՝ ԵԽԽՎ ամբիոնից հայտարարել է Դավութօղլուն ու նշել, որ իր համար ամենակարևոր պահը տարածաշրջանի ռազմական հակամարտությունների կարգավորումն է։
Թուրքիան այնպիսին չէ, ինչպիսին պատկերացնում եք կամ ինչպիսին ձեզ ներկայացրել են՝ այսօր ԵԽԽՎ-ում հայտարարեց Թուրքիայի վարչապետ Ահմեդ Դավութօղլուն՝ հավելելով, թե իր երկրի մասին պատկերացումները պետք չէ քարոզչական ճնշումների ներքո ձևավորել:
Այս դիտարկումը Դավութօղլուն արեց՝ պատասխանելով եվրապատվիրակներից մեկի հարցին: Իսկ հարցն այսպիսին էր. խոսում եք իրավունքներից, ժողովրդավարությունից, բայց Թուրքիայում հակառակ երևույթներ են արձանագրվում՝ բռնություններ իրավապաշտպանների, լրագրողների նկատմամբ, ազգային փոքարամասնությունների ներկայացուցիչների հետապնդումներ:
Մեր թերթերում իշխանությունների լուրջ քննադատություն կա, եթե հետևեք չեք ասի, թե վերահսկվում են՝ ասաց Դավութօղլուն, իսկ քրդական հիմնահարց, նշեց, որ Թուրքիան չունի, բոլոր փոքրամասնությունները հավասար են , որևէ խտրական մոտեցում չկա, ինչ-որ քաղաքացիական պատերազմի հիմք նույնպես՝ նշեց Դավութօղլուն ու եվրոպացի պատվիրակներին վստահեցրեց ՝ Թուրքիայում սիրիական սցենարը հնարավոր չէ:
Մինչև հարցերին պատասխանելը՝ Դավութօղլուն անդրադարձել էր տարբեր թեմաների, այդ թվում՝ Ղարաբաղյան խնդրին, նշելով, որ Թուրքիան՝ որպես ԵԱՀԿ Մինսկի խմբի անդամ, հանդես է գալիս հակամարտության խաղաղ կարգավորման օգտին, իսկ ստատուս քվոն անընդունելի է համարում:
Ղարաբաղյան պատերազմի թեման ԵԽԽՎ այսօրվա քննարկումների օրակարգում ևս փորձեցին պահել հայաստանյան պատվիրակության անդամները: Լևոն Զուրաբյանը խոսեց Ադրբեջանի սանձազերծած ագրեսիան ռազմական հացագործություն որակելու մասին, Սամվել Ֆարմանյանը միանգամիվ մի քանի կոնվենցիաների խախտումներ թույլ տված կողմի պատասխանատվության հարցը շեշտադրեց: Հակառակորդը զերծ չի մնացել զոհված հայ զինվորների մարմինները խոշտանգելուց, քաղաքացիական անձանց նկատմամբ բռնություններ կիրառելուց՝ ասել է Ֆարմանյանը ու նշել. բռնության ենթարկվաներից մեկը՝ 104- ամյա հայ տատիկ է, ով 6 տարով ավելի մեծ է , քան Ադրբեջանը՝ որպես պետություն:
Հայ պատվիարկներին այսօր իր հարցով օգնեց ադրբեջանական պատվիրակության ներկայացուցիչը: Գանիրա Փաշաևայի հարցին, թե Հայաստանը օկուպացրել է Ադրբեջանի տարածքները, մեկ միլիոն ադրբեջանցի այսօր փախստական է, Եվրոպական հանձնաժողովի նախագահ Ժան-Կլոդ Յունկերի շատ կարճ պատասխան տվեց՝ այն, ինչ կարող եմ ասել, հետևյալն է՝ մի կրակեք և հարգեք հրադադարը:
