Հայաստանն ու Ադրբեջանը պետք է հավատարիմ մնան այն պարտավորություններին, որոնք ստանձնել են ԵԽ-ին անդամակցելիս ՝ այսօր ասել է ԵԽԽՎ գլխավոր քարտուղար Պեդրո Ագրամունդը նստաշրջանի մեկնարկին հնչեցրած բացման խոսքում: Խորհրդարանական վեհաժողովի գարնանային նստաշրջանը, հիշեցնենք, մեկնարկել է այսօր:
Իր ելույթում կառույցի ղեկավարն անդրադարձել է հրատապ մի քանի թեմաների , այդ թվում՝ ղարաբաղյան հիմնահարցին:
ԵԽ անդամ երկրներին շարունակում են բաժանել հակամարտությունները ՝ ասել է Ագրամունդը և նշել, որ ԵԽԽՎ-ն թեև հակամարտության կարգավորման ուղիղ մանդատ չունի, բայց խորհրդարանական դիվանագիտությունը կարող է նպաստել դիրքորոշումների մերձեցմանը:
Շարունակելու եմ զբաղվել այս հարցով ՝ որպես առաջնահերթ խնդիր՝ ասել է ԵԽԽՎ գլխավոր քարտուղարը, նաև արձանագրել, թե միջազգային իրավունքի նորմերից հատկապես որին է տալիս իր նախապատվությունը:
«Միշտ պաշտպանել եմ ԵԽ անդամ պետությունների տարածքային ամբողջականության սկզբունքը և կողմերին կոչ արել պահպանել միջազգային իրավունքի նորմերը: Թե՛ Հայաստանին, թե՛ Ադրբեջանին կոչ եմ անում հավատարիմ մնալ այն պարտավորություններին, որոնք ստանձնել են ԵԽ-ին անդամակցելիս և քաղաքական կամք գտնել խնդրի խաղաղ կարգավորման համար»:
Մինչ նստաշրջանի մեկնարկը, ի դեպ, ենթադրվում էր, որ ղարաբաղյան պատերազմի թեման «հատուկ հարցի» կարգավիճակով քննարկման առարկա կդառնա լիագումար նիստի ընթացքում: Օրակարգը քննարկելով, սակայն, ԵԽԽՎ բյուրոն որոշել է հրատապ հարցի կարգավիճակ տալ պանամական փաթեթին:
Հայ պատվիրակները ղարաբաղյան պատերազմի հարցը քննարկման առարկա կդարձնեն այլ ձևաչափերով: Այսօր օրվա երկրորդ կեսին նախատեսվում է մարդու իրավուքների գլխավոր հանձնակատարի հաշվետվության քննարկումը: Մեր պատվիրակության անդամները նրան ուղղված հարցերով բարձրացնելու են ղարաբաղյան պատերազմի ժամանակ Ադրբեջանի կողմից միջազգային բազմաթիվ նորմերի խախտման հարցը:
