տեղադրված է ժամը 13։05- ին
լրացված է ժամը 18։34- ին
Միջանձնային հարաբերություններ, սոցիալական ու տնտեսական խնդիրներ, վերջին տարիներին նաև արտագնա աշխատանք: Սրանք մեր երկրում գրանված ամուսնալուծությունենրի թվի աճի հիմնական պատճառներն են: Հետազոտությունն այսօր է ներկայացվել: «Ռադիոլուրը» զրուցել է նաև ընտանեկան հոգեբանի հետ՝ փորձելով պարզել, թե մինչ ամուսնալուծության դիմելը ինչպիսի խնդիրների առջև են կանգնում զույգերը: Հոգեբանի խոսքով՝ վերջին տարիներին Հայաստանում ամուսնալուծությունների հիմնական նախաձեռնողը կանայք են:
Վերջին տարիներին մեր երկրում ամուսնալուծությունների թվի աճը անհանգստացրեց անգամ վարչապետին: Դեռ 2014-ին Հովիկ Աբրահամյանը աշխատանքի ու սոցիալական հարցերի նախարարությանը հանձնարարեց ուսումնասիրել ու պարզել պատճառները: 2015-ին աշխատանքի ու սոցիալական հետազոտությունների ազգային ինստիտուտն իրականցրել է այդ հետազոտությունն ու պարզել, որ Հայաստանում իսկապես ավելացել է ամուսնալուծությունների թիվը:
Աշխատանքի ու սոցիալական հետազոտությունների ազգային ինստիտուտի տնօրենի տեղակալ Գառնիկ Նալբանդյանը նշում է, որ հիմնականում պատճառը սոցիալական ու տնտեսական խնդիրներն են, միջանձնային հարաբերությունները։ Վերջին տարիներին՝ ամուսնալուծությունների վրա ազդող գործոններից է նաև միգրացիան է, «երբ ընտանիքի անդամներից մեկը, բնական է, հիմնականում ամուսինը, տեղափոխվում է մեկ այլ երկիր, որից հետո կամ կապն է կտրվում, կամ հետ վերադարձի հետ կապված իրավական խնդիրներ ունի, կամ էնտեղ զուգահեռ ընտանիք է ձևավորվում, որն ի վերջո բերում է այստեղ ամուսնալուծության»:
Գառնիկ Նալբանդյանի փոխանցմամբ՝ ամուսնալուծությունների թիվը համեմատաբար բարձր է Լոռու, Արարատի ու Արմավիրի մարզերում: Վերջին տարիներին ավելի հաճախ սկսել են ամուսնալուծվել նաև 20 և ավելի տարիներ համատեղ ապրած ամուսինները, սա նույնպես հետազոտությունն է պարզել: Այստեղ էլ զրուցակցիս խոսքով, հիմնական, այսպես ասենք, մեղավորն արտագնա աշխատանքն է: Փորձեցինք պարզել նաև, թե ավելի հաճախ քանի երեխա ունեցող ընտանքիներն են ամուսնալուծվում։ «Վերլուծությունենրի ժամանակ պարզվել է, որ վեց երեխա ունեցող ընտանիքները նույնպես ամուսնալուծվում են։ Դա իհարկե փոքր տոկոս է կազմում, իսկ հիմնականում մեկ կամ երկու երեխա ունեցողներն են»,- ասում է ինստիտուտի փոխտնօրենը:
«Ռադիոլուրը» զրուցեց նաև ընտանեկան հոգեբան Արկադի Մեհրաբյանի հետ՝ փորձելով պարզել, թե մինչ ամուսնալուծության դիմելը ինչպիսի խնդիրների առջև են կանգնում զույգերը: Պարզվեց՝ երիտասարդներն ամուսնանալիս հիմնականում միմյանց բնավորությունների դրական գծերն են տեսնում միայն, որոշ ժամանակ անց, երբ հույզերը, սիրահարվածությունն անցնում է, սկսում են նկատել նաև բացասական որակները: Շատ հաճախ ամուսինենրը դժգոհում են, որ բնավորության գծերի փոխոխություններ են տեսնում: Իրականում, հոգեբանի պնդմամբ, պարզապես բնավորության որոշակի գծեր սկզբնական փուլում անտեսվում են:
Ընտանեկան խնդիրներն ավելի շատ մարզերում են հանդիպում, սակայն ընտանեկան հոգեբանի ավելի շատ Երևանում են դիմում: Զրուցակիցս անդրադարձավ նաև ամուսնալուծությունների թվի աճին: «Սոցիալական խնդիրներն էլ կարող են լինել, սակայն, կտրուկ աճը դրա մասին է խոսում: Առաջ մարդը միգուցե սոցիումի կարծիքից ամաչում էր, հիմա չեն ամաչում»։
Հոգեբանն ասում է, որ վերջին տարիներին ամուսնալուծությունների հիմնական նախաձեռնողը կանայք են: Ամուսնալուծված ընտանիքներում երեխաները խոցելի խմբում հայտնվելու ավելի հավանականություն ունեն։ «30 տոկոս աղքատություն ունեցող մեր իրականությունում մեծ է նաև ռիսկի գործոնը, որ հենց այս ընտանիքների երեխաներն են հայտնվում սոցիալական հաստատություններում»,- ասում է Աշխատանքի ու սոցիալական հետազոտությունների ազգային ինստիտուտի տնօրենի տեղակալ Գառնիկ Նալբանդյանը:
Մեր երկիրը, սակայն, վերջին տարիներին որդեգրել է երեխանեի շուրջօրյա խնամքի կենտրոնների բեռնաթափման, խնամատար ինստիտուտի ներդրման , ինչպես նաև երեխաներին կենսաբանական ընտանիքներ վերադարձնելու քաղաքականությունը: Աշխատանքի ու սոցիալական հարցերի նախարար Արտեմ Ասատրյանի խոսքով, կենսաբանական ընտանիքների համար աջակցության ծրագրեր պետք է իրականացվեն։
