Կառավարության նիստի սկզբում վարչապետը էկոնոմիկայի ու ֆինանսների նախարարությանը հանձնարարել է Վերահսկիչ պալատի հետ միասին ուսումնասիրել սոցիալական փաթեթի շրջանակներում ՀՀ-ում ու ԼՂՀ-ում հանգստի կազմակերպման հետ կապված մտահոգությունները։ Դեղերի շուկայում մոնիթորինգը ավարտված է: Արդյունքները կրկին կառավարության նիստի սկզբում են ներկայացվել: Դե իսկ կառավարության այսօրվա նիստի օրակարգում շուրջ երեք տասնյակ հարցեր էին: Առողջապահության ոլորտում ընթացող բարեփոխումների և իրավական դաշտի ներդաշնակեցմամբ պայմանավորված՝ կառավարությունը լրացումներ և փոփոխություններ է կատարել նախկինում ընդունած որոշումներից մեկում: Նախատեսվում է Վանաձորի թիվ 4 պոլիկլինիկան միավորել Վանաձորի թիվ 1 պոլիկլինիկային, իսկ Կուրթանի, Ագարակի, Գյուլագարակի, Գարգառի առողջության առաջնային պահպանման կենտրոնները միավորել Ստեփանավանի բժշկական կենտրոնում: Ըստ հիմնավորման՝ բուժօգնության օպտիմալացման արդյունքում խնայված ֆինանսական միջոցները կուղղվեն բժշկական կազմակերպությունների զարգացմանը` սարքավորումների ձեռքբերում, բուժանձնակազմի, շենքային պայմանների բարելավում:
Դեղերի շուկան հայրենի կառավարության ուշադրության կենտրոնում. առողջապահության նախարարությունը վարչապետի հանձնարարականով ուսումնասիրություններ է կատարել 54 անուն դեղերի շուկայում:
2016 թվականի մարտին 2015 թվականի դեկտեմբերի համեմատությամբ նվազել են միջին հաշվով 1.4%-ով: Ընդ որում՝ դրանցից 47 անվանում ունեցող դեղերի միջին շուկայական գները նվազել են շուրջ 4%-ով, իսկ 7-ի գները բարձրացել են շուրջ 3%-ով: Վարչապետ Հովիկ Աբրահամյանը առողջապահության նախարարին հանձնարարեց դեղերի շուկան ուշադրության կենտրոնում պահել:
Հայաստանում Ճառագայթային բուժման ժամանակակից կենտրոն կստեղծվի: Առողջապահության նախարար Արմեն Մուրադյանի փոխանցմամբ, նախագծի ընդունումը պայմանավորված է Ուռուցքաբանության գերազանցության կենտրոն ստեղծելու կառավարության որոշմամբ , ինչպես նաև չարորակ նորագոյացություններով հիվանդացության թվի տարածվածության ու մահացության էական աճով:
Ոլորտի պատասխանատուի խոսքով, ճառագայթային բուժումը չարորակ նորագոյացությունների բուժման առավել տարածված ու ծախսարդյունավետ մեթոդներից է: ,Այն ցուցված է չարորակ նորագոյացություններով հիվանդների մինչև 50 տոկոսին: Մուրադյանի խոսքով, ճառագայթային բուժումը ՀՀ-ում իրականցվում է ընդամենը երկու բուժհաստատությունում, որոնք չեն կարող ապահովել անհրաժեշտ պահանջարկը և որոնց տեխնիկական հագեցվածությունը բավարար չէ:
Հայաստանում Ճառագայթային բուժման ժամանակակից կենտրոն ՓԲԸ-ն հագեցած կլինի ժամանակակից բուժման ու ախտորոշիչ սարքավորումներով:
Առողջապահության նախարար Արմեն Մուրադյանն արդեն կառավարության նիստից հետո հստակեցրեց.«Կենտրոնը 100 տոկոսով պետական մասնակցությամբ ընկերություն է լինելու, որի բաժնետոմսերի կառավարումը կպատկանի առողջապահության նախարարությանը»:
Կառավարությունը «ԲԱԳԵԶՅԱՆ» սահմանափակ պատասխանատվությամբ ընկերությանը «Մերիդիան» ազատ տնտեսական գոտում շահագործողի թույլտվություն տրամադրեց: Ոսկերչական ոլորտում հայտնի ընկերությունը 9 տարվա ընթացքում խոստանում է 68 մլն 500 հազար ԱՄՆ դոլարի ներդրում, իսկ առաջիկա 5 տարիներին՝ առնվանզ 70 նոր աշխատատեղ՝ 250-500 դոլար աշխատավարձով: Էկոնոմիկայի նախարար Արծվիկ Մինասյանի տեղեկացմամբ, մինչ այժմ մեր երկրում գործող ազատ երկու՝ Ալյանս ու Մերիդիան տնտեսական գոտիներում կաշխատեն տասը շահագործող ընկերություններ, ներդրումների ծավալը՝ 101,2 մլն ԱՄՆ դոլար է կազմելու, կստեղծվի շուրջ 450 աշխատատեղ:
Գյուղական համայնքները դժվարանում են վերադարձնել իրենց այսպես ասենք բարեկեցության համար տրամադրած գումարները: Բարեկեցությունն այս դեպքում գազիֆիկացմումն է: 2012թ ֆինանսների նախարարությունը 249 մլն 300 հազար դրամի չափով գումարը տրամադրել է էներգախնայողության հիմնադրամին, վերջինս էլ այն փոխանցել է գյուղական համայնքներին: Մինչև 2015թ դեկտեմբերի 31- ը գումարները պետք է վերադարձված լինեին: Սակայն պարտքը մարել են միայն Ուջան ու Պտղավան գյուղերը, այն էլ՝ մասամբ: Տարածքային կառավարման ու զարգացման նախարար Դավիթ Լոքյանն առաջարկեց երկարաձգել գումարների վերադարձի ժամկետը մինչև տարեվերջ: Հովիկ Աբրահամյանը կարծում է, որ հարցը պետք է խորքային քննարկել , ապագա ծրագրերի մասով նույնպես կան պարտավորություններ, որ համայնքները չեն կատարում: Խնդիրներ են լինում վարկավորող ու միջազգային կազմակերպությունների հետ:
Մոտ հինգ մլն դոլարի աշխատանքներ չեն սկսվում, քանի որ համայնքների կողից համաֆինանսավորումը չի կատարվում:
Կառավարությունը հաստատեց նաև Անշարժ գույքի կադաստրի պետական կոմիտեի զարգացման 2016 թվականի համալիր ծրագիրը, որի նախագիծը ներկայացնելուց հետո վարչապետ Հովիկ Աբրահամյանը հիշեցրեց, որ 2015-ին կոմիտեն բյուջեն ամբողջությամբ չի կատարել, մտավախություն կա, որ այս տարի էլ նույնը կլինի: Կառավարությունից ակնկալիք չունենաք, ասաց վարչապետը:
Վայոց ձորի մի շարք ճանապարհներ, ինչպես նաև Սյունիքի մարզի Գորիս- Կապան ավտոճանապարհը անմխիթար վիճակում է, կառավարության նիստում հայտարարեց վարչապետ Հովիկ Աբրահամյանն ու տրանսպորտի ու կապի փոխնախարարին հանձնարարեց գործընթացն արագացնել: «Մենք որևէ լրացուցիչ գումար չենք հատկացնելու»,- տեղեկացրեց կառավարության ղեկավարը,- «238 մլն դրամ է անհրաժեշտ, սակայն, տրանսպորտի ու կապի նախարարությունն աշխատանքները կիրականացնի մրցույթներից տնտեսած գումարների հաշվին»:
