ԱԺ պատգամավոր Նիկոլ Փաշինյանը դիմել է ՀԱԿ խմբակցության ղեկավար Լեւոն Զուրաբյանին առաջարկով, որի առիթը Հրազդանում ապրիլի 17-ին սպասվող ընտրություններն են: Փաշինյանը ՀԱԿ-ին հորդորում է Հրազդանի ընտրատեղամասային հանձնաժողովների՝ խմբակցությանը պատկանող տեղերը զիջել Սասուն Միքայելյանի առաջադրած թեկնածուներին : Զիջել տերմինը Փաշինյանը ճշգրիտ չի համարում, ասում է խնդիրը իրավական հարթությունում է: ՀԱԿ-ում հավաստիացնում են, որ Հրազդանում մարդկային անհրաժեշտ ռեսուրսներ ունեն:
Ստացվել է այնպես, որ խորհրդարանական նույն խմբակցության անդամն ու ղեկավարը հաղորդակցվում են գրավոր: ՀԱԿ խմբակցության անդամ Նիկոլ Փաշինյանը գրությամբ դիմել է նույն խմբակցության ղեկավար Լևոն Զուրաբյանին:
Առիթը` ապրիլի 17-ին Հրազդանում սպասվող ընտրություններն են: Քաղաքապետ դառնալու հայտ ներկայացնողների թվում « Քաղաքացիական պայմանագիր» կուսակցության վարչության անդամ Սասուն Միքայելյանն է: Նիկոլ Փաշինյանը նրա նախընտրական շտաբի ղեկավարն է: Դիմել է ՀԱԿ-ին ընտրատեղամասային հանձնաժողովների անդաներներ նշանակելու իրավունքը Սասուն Միքայելյանին զիջելու առաջարկով:
Զիջել տերմինին Փաշինյանը դեմ է: «Այդ տեղերը «Հայ ազգային կոնգրես» կուսկացությանը չեն, որ նրանք զիջեն կամ չզիջեն: Եթե հանձնաժողովներում նշանակվեն Սասուն Միքայելյանի ներկայացրած մարդկանց, դա չի նշանակի, որ ինչ-որ մեկն ինչ-որ բան զիջեց»:
Փաշինյանը բացատրում է, որ Ընտրական օրենսգրքի համաձայն՝ տեղամասային ընտրական հանձնաժողովներում նշանակումներ կատարում են կամ խորհրդարանական խմբակցություններ ձևավորած կուսակցությունները կամ դաշինքների դեպքում՝ խմբակցությունները: ՀԱԿ-ը խորհրդարան է մտել որպես դաշինք, հետևաբար՝ հանձնաժողովներում նշանակումներ կատարելը խմբակցության որոշումն է:
Նշեմ, որ խոսքը 25-րդ ընտրատարածքի 28 ընտրական տեղամասերում անդամներ նշանակելու մասին է: Նրանց թեկնածությունները պետք է առաջադրվեն մարտի 18-ից: «Հիմա Սասուն Միքայելյանը ՀԱԿ նախընտրական ցուցակի 13-րդ հորիզոնականում է գտնվել: Նրա դերն անուրանալի է ՀԱԿ խմբակցության ձեւավորման գործում: Կարծում եմ՝ սրանք փաստեր են, որոնք վիճարկման ենթակա չեն»:
Վիճարկման ենթակա փաստեր են, թե ոչ՝ ՀԱԿ խմբակցությունում դեռ մտածում են: Հայտնի է, որ խմբակցության պատգամավորներից 4-ը կողմ են Փաշինայնի առաջարկին, բայց խմբակցությունն առայժմ որոշում չունի: «Նամակն ստացել եմ, ձեզ հուզող բոլոր հարցերի պատասխանը շատ շուտով կստանաք»,- ասում է Լևոն Զուրաբյանը։
Մինչ ՀԱԿ-ը մտածում է և անուղղակիորեն հավաստիացնում, որ Հրազդանում մարդկային անհրաժեշտ ռեսուրսներ ունեն, Փաշինյանից փորձեցինք այլ հարցի պատասխան ստանալ: Ցուցակի ձևավորումից հետո շատ ջրեր են հոսել, իրավիճակ ու հարաբերություններ են փոխվել: Արդյո՞ք իրար միջև այսօր եղած հարաբերությունները թույլ տալիս են նման առաջարկ անել: «Գիտեք, ջրերը հոսել են, իսկ օրենսդրությունը չի հոսել, օրենսդրությունը ոնց եղել է՝ այդպես էլ մնացել է: Հիմա մենք առաջիկայում այդ օրենսդրության հոսքն էլ կտեսնենք: Ես չեմ խոսում հարաբերությունների մասին, ես չեմ խոսում տրամադրությունների մասին, ես խոսում եմ օրենսդրության և դրանից բխող դիրքորոշումների մասին։ Մենք չենք խոսում հարաբերությունների մասին»:
Փաշինյանն ասում է՝ այս գրագրությամբ հարաբերություններ չեն պարզում:
