տեղադրվել է ժամը 13։38- ին
վերջին լրացումը ժամը 18։39- ին
Խորհրդարանն այսօր շարունակել է հերթական քառօրյայի աշխատանքը՝ թեմատիկ ընդգրկուն շրջանակով: Պատգամավորները նախ քննարկել են ԵՏՄ-ից ներկրվող ավտոմեքենաներն ավելացած արժեքի հարկից ազատելու հարցը. կառավարություն-ԱԺ համատեղ նախաձեռնությունը խորհրդարանում ողջունվել է, բայց նաև ուշացած որակումն է ստացել: Օրենսդիրը լսել է ՏՄՊՊՀ նախագահին ու տեղեկացել, թե ինչ ծրագրով է առաջնորդվելու կառույցը 2016-ի ընթացքում: Տնտեսական թեմաների արանքում խորհրդարանական առօրյան նաև պատմական պահ է արձանագրել. քննարկվել է Զարուհի Փոստանջյանի օրենսդրական նախաձեռնությունը, որը վայելում է խորհրդարանական մեծամասնության աջակցությունը: Կողմերը համակարծիք են, որ ուրիշի փոխարեն քվեարկող պատգամավորները պետք է կարգազանց համարվեն:
Կառավարությունը որոշել է հրաժարվել ԵՏՄ տարածքից ներկրվող ավտոմեքնենաների համար ավելացած արժեքի հարկի գանձումից: Առաջարկը վերաբերում է միայն ֆիզիկական անձանց, գործելու է «մեկ անձ, մեկ ավտոմեքենա» մոդելով: Նախաձեռնությունը պաշտպանում են թե ընդդիմադիր, թե իշխանական խմբակցությունները, որոշումը սպասված, բայց ուշացած են գնահատում:
Հիմնական խնդիրը մեկն է. մոտ մեկ տարուց ավելի ֆիզիկական անձանցից ԵՏՄ-ից մեքենաներ ներկրելիս այս հարկատեսակը գանձվել է՝ ընդհանուր առմամբ մոտ 1.7 մլրդ դրամ: Արդյո°ք նախագիծը ենթադրում է փոխհատուցման որևէ մեխանիզմ:
Կառավարության բացթողումը մատնանշող կամ գանձումը ապօրինի համարող պատգամավորներին կառավարության անունից պատասխանեց Միջազգային տնտեսական ինտեգրման և բարեփոխումների փոխնախարար Սուրեն Կարայանը: Նրա պարզաբանմամբ՝ ավելացած արժեքի հարկի գանձումն ի սկզբանե ուներ ժամանակավոր բնույթ։
«Ժամանակ էր պետք, որպեսզի բանակցեինք ԵՏՄ կառույցների հետ, որ առանձնահատուկ մոտեցումներ սահմանվեր ՀՀ-ից ԱԱՀ գանձնման սկզբունքների առումով, ինչը հնարավորություն կտար ԱԱՀ-ի 0-ական դրույքաչափը հավասար կիրառել»:
Փոխնախարարը պատրաստակամություն հայտնեց քննարկել քանակական սահմանափակումների հարցը, իսկ հեղինակներից Վարդան Այվազյանը խորհրդարանին այլ բան հորդորեց. նախագիծն ըստ էության հարկային ռեժիմի թեթևացում է նախատեսում, ընդունել այն, հետո նոր մտածել հարակից հարցերի մասին:
Հարկային օրինագիծն առաջին ընթերցմամբ քվեարկվելու է վաղը, ինչպես նաև այն օրինագիծը, որ ավելի ուշ քննարկվեց ու հասցրեց պատմական որակումը ստանալ: Խոսքը Զարուհի Փոստնաջյանի կողմից ԱԺ կանոնակարգում առաջարկվող փոփոխությունների մասին է, որը պաշտպանում է նաև խորհրդարանական մեծամասնությունը: «Այս ինը տարիների ընթացքում, ինչ ես պատգամավոր եմ, սա առաջին դեպքն է, երբ մեծամասնությունը կողմ է իմ նախաձեռնության »,- ասում է Փոստանջյանը։
Նա առաջարկում է փոփոխություն կատարել ԱԺ կանոնակարգում, մասնավորապես՝ սահմանել, որ բացակա գործընկերների փոխարեն քվեարկելը կարգազանցություն է և ենթակա է պատժվելու կանոնակարգում սահմանված կարգապահական միջոցներով։ Դրանցից ամենամեղմը, ի դեպ, զգուշացումն է, ամենախիստը՝ պատգամավորին 6 օրով Ազգային ժողովի նիստերի դահլիճում ներկա գտնվելու իրավունքից զրկելը: «Եթե օրենսդրական նախաձեռնությունն իր էությամբ կառուցողական է, ապա անկախ նրանից, թե ով է նրա հեղինակը, նա բոլոր դեպքերում ստանում է Ազգային ժողովի, այդ թվում՝ նաև մեծամասնության աջակցությունը»,- ասում է հանրապետական Խոսրով Հարությունյանը։
Պատգամավորը, որն այս նստաշրջանում ղեկավարում է ԱԺ էթիկայի հանձնաժողովը , ոչ միայն պաշտպանում է Փոստանջյանի նախաձեռնությունը, այլև ցանկանում, որ այն օր առաջ ընդունվի: Հարությունյանը նախագծի երկրորդ ընթերցումն արագացնելու առաջարկով դիմել է ԱԺ ղեկավարությանը, քանի որ բոլորվին վերջերս է առնչվել ուրիշի փոխարեն քվեարկելու խնդրին:
Ազգային ժողովի էթիկայի հարցերով ժամանակավոր հանձնաժողովը վերջերս լրագրողի ներկայացրած դիմումի և տեսանյութի հիման վրա էթիկայի կանոնների խախտում որակեց 7 պատգամավորների՝ ուրիշի փոխարեն քվեարկելու վարքագիծը:
Ավելացնեմ նաեւ՝ խորհրդարանն այսօր հասցրեց լսել Տնտեսական մրցակցության պաշտպանության պետական հանձնաժողովի նախագահին: Արտակ Շաբոյանը պատգամավորներին ներկայացրեց էր 2016 թ. գործունեության ծրագիրը: Հիմնական քննարկումը կծավալվի վաղը, առավել ևս, որ հանձնաժողովի նախագահն այսօր քննարկման համար 2 գրավիչ ցուցանիշ է ներկայացրել. հակամենաշնորհային քաղաքականության արդյունավետության ցուցանիշը, ըստ Համաշխարհային մրցունակության զեկույցի, Հայաստանում բարելավվել է 17 կետով , գերիշխող դիրք գրավող ընկերությունների ազդեցության մակարդակը գնահատող ցուցանիշը՝ 14-ով:
