Հոգևոր մայրաքաղաք Էջմիածնում տարեցտարի ավելանում են կանաչ գոտիները, հիմնվում են նոր այգիներ, պաշտպանիչ անտառաշերտեր: Քաղաքի բարեկարգ տեսքը կարևորվում է զբոսաշրջիկների համար:
Այս տարի նախատեսվել է ծայրամասային թաղամասերից մեկում հիմնել նոր այգի:
Նախորդ տարիներին Էջմիածնի արևմտյան թաղամասում գրեթե 7 հա վրա հիմնվել էր նորատունկ այգի, սակայն նախորդ տարվա ոռոգման ջրի սակավության պատճառով ծառերի մի մասը չորացավ: Էջմիածնի քաղաքապետ Կարեն Գրիգորյանը տեղեկացրեց, որ ընդերքի ջրի մակարդակի իջեցման պատճատով տեղի խորքային հորը ցամաքել էր և չեն կարողացել ապահովել նորատունկ ծառերի ոռոգումը: Հոգևոր մայրաքաղաքը, ի տարբերություն Արմավիրի մարզկենտրոնի, բացի կանաչապատ տարածքից աչքի ընկնում նաև ծաղկապատմամբ:
Բարեկարգվել են հուշարձանների տարածքները , նորոգվել են շատրվանները: Մեծ ուշադրություն է դարձվում Կոմիտասի անվան հրապարակին ու հարակից տարածքին, որ միաժամանակ սուրբ Էջմիածնի մուտքն է հանդիսանում: Մշակութային կյանքով հարուստ Էջմիածին քաղաքում շուտով կավարտվի Կոմիտասի անվան մշակույթի պալատի հիմնանորոգման աշխատանքները:
Կանաչ գոտիների պահպանման նպատակով նախատեսվել է խորացնել եղած ջրհորների խորությունը և ապահովել ոռոգման ջրով:
