Հերթական ահազանգը մայրաքաղաքի կենտրոնում ծառահատումների վերաբերյալ: Հայաստանի սպառողների միության նախագահ Արմեն Պողոսյանը լրագրողների հետ հանդիպման ընթացքում բարձրաձայնել է, որ Արամ Խաչատրյանի արձանի դիմացի այգում՝ Երևանի վերջին կանաչապատ տարածքում, ծառերը հատվում են նոր զվարճանքի կենտրոն կառուցելու նպատակով: Ըստ նրա՝ այգում ծառերին փոխարինելու է զվարճանքի նոր կենտրոն: «Ռադիոլուրը», սակայն, զրուցել է նաև տարածքի վերահսկիչ Մամիկոն Հարությունյանի հետ, ով վստահեցրել է, որ որևէ ծառահատումներ տեղի չեն ունենում, ընդհակառակը կանաչապատման ծավալները մեծանալու են: Իսկ այգում որևէ նոր շինություն չի կառուցվում, նախկին սրճարանի և այգու արդիականացման աշխատանքներ են ընթանում:
«Նախկինում եղել է սրճարան, հիմա բարեփոխումներ ենք կատարում: Վերանորոգում ենք սրճարանը: Լինելու է բար- սրճարան, մանկական սրճարան, մանկական խաղահրապարակ, կանաչապատումն է շատանալու: Ոչ մի ծառահատում չի լինելու, եթե նման բան լիներ, մարդիկ կտեսնեին: Ուղղակի փոփոխություններ ենք անում»,- ասում է Մամիկոն Հարությունյանը:
«Ինչ են սարքում, ինձ հետաքրքիր չէ: Բայց կանաչ տարածքն է հատվում: Ես խոսել եմ շինարարության ղեկավարների հետ, ասում են ծառեր չենք կտրել, ու չենք կտրելու, դա հեքիաթ է»,- ահազանգում է Արմեն Պողոսյանը:
