Կոալիցիոն բանակցություններ, Մարդու իրավունքների պաշտպանի թեկնածուի առաջադրում. այս թեմաներն ուղեկցեցին գարնանային նստաշրջանի առաջին քառօրյան և այսօր էլ եղել են այն ամփոփող խորհրդարանական ճեպազրույցների առանցքում: Օմբուդսմենի թեկնածուի հարցում խորհրդարանական ուժերից կողմնորոշվել են 3- ը՝ ՀՀԿ-ն, ԲՀԿ-ն և ՕԵԿ-ը: Նրանք թեկնածու առաջադրելու որոշումներն արդեն կայացրել են՝ ի տարբերություն ՀՅԴ-ի և ՀԱԿ-ի:
Հիշեցնենք, ԱԺ-ն Մարդու իրավունքների 4-րդ պաշտպանին կընտրի թերևս հաջորդ քառօրյայի ընթացքում: Մինչ այդ` քաղաքական ուժերը թեկնածուներ կառաջադրեն, նրանցից մեկին քվեարկությամբ կընտրի պետաիրավական հարցերի հանձնաժողովը և որպես հիմնական թեկնածու կառաջադրի խորհրդարանի քննարկմանը: Ինչ վերաբերում է կոալիցիոն քննարկումներին, ապա բանակցություններ վարող կողմերն այսօր կրկին լրագրողներին հորդորել են չշտապել և մի փոքր էլ սպասել։
