Ամերիկյան Կլարկի համալսարանն առաջինն էր, որ հաստատեց Հայոց ցեղասպանությունը որպես դոկտորական ուսումնասիրության թեմա: Խաչիկ Մուրադյանն առաջինն է, որ համալսարանի Ստրասլերի Հոլոքոստի եւ ցեղասպանության հետազոտությունների կենտրոնում պաշտպանել է դոկտորական թեզը։
Մուրադյանի՝ «Ցեղասպանությունը եւ մարդասիրական աջակցությունը Օսմանյան Սիրիայում (1915-1917)» թեմայով ատենախոսության պաշտպանությանը ներկա է եղել նաեւ թուրք հայտնի ցեղասպանագետ Թաներ Աքչամը։
«Այս ատենախոսական աշխատանքը նշանավորում է պատմական բեկում Հայոց ցեղասպանության հետազոտություններում»,- ասել է Աքչամը Մուրադյանին նվիրված տոնակատարության ժամանակ, որը տեղի է ունեցել հունվարի 29-ին՝ Ստրասլերի կենտրոնի գրադարանում:
«Նա ոչ միայն մեր առաջին դոկտորն է Հայոց ցեղասպանության ոլորտում, այլ նաեւ առաջին դոկտորի աստիճանակիրը Հյուսիսային Ամերիկայում՝ այսքան տարիների լռությունից հետո»,- ասել է Աքչամը։
Մուրադյանը 2007-2014թթ.-ը եղել է Armenian Weekly շաբաթաթերթի խմբագիր: Ստացել է բազմաթիվ պարգեւներ, 2014-ին Չինաստանում 20- դարի հայ համայնքի ուսումնասիրության համար արժանացել է Գյուլբենկյան հայագիտական հետազոտությունների կրթաթոշակակի։ Նույն թվականին Պոլսահայության կազմակերպությունը նրան շնորհել է նաեւ Հրանտ Դինքի ազատության ու արդարության առաջին մեդալը:
