ՄԱԿ-ի Երևանյան գրասենյակում այսօր ազդարարվել է ՄԱԿ-ի Զարգացման ծրագրի (ՄԱԶԾ) Կոլբա նորարարական լաբորատորիայի «Նորարար առաջընթաց» ծրագրի մեկնարկը: Եվրոպական միության կողմից ֆինանասավորվող ծրագիրը նախատեսում է Հայաստանում առաջին անգամ անցկացվող «Հանրային կառավարման նորարարության շաբաթ» միջոցառումների շարք: Այն սկսվել է հունվարի 30-ին հանրահայտ TEDx ձևաչափով կազմակերպված համաժողովով և կշարունակվի «Կոլբա-զրուցարան» ձևաչափի հանդիպումով և խորհրդատվական քննարկումներով` հանրային կառավարման ոլորտում աշխատող մասնագետների համար:
Ինչ է իրենից ներկայացնում հանրային կառավարման նորարարությունը և ինչ կարելի է ձեռնարկել այս ոլորտում: Հայաստանում առաջին անգամ անցկացվող հանրային կառավարման նորարարության շաբաթվա ընթացքում քննարկման թիրախում կլինեն հենց այս հարցերը: Նշվածը ՄԱԿ-ի Զարգացման ծրագրի նախաձեռնությամբ և Եվրամիության ֆինանսավորմամբ իրականացվող «Նորարար առաջընթաց» ծրագրի մեկնարկային միջոցառումն է: «Ծրագիրը նորարարություն է ոչ միայն Հայաստանում, այլև աշխարհում: Նպատակն է ստեղծել հարթակ, որը կմիավորի մարդկանց գաղափարները, որոնք կծառայեն երկրի զարգացմանն ու առաջընթացին»,-նշում է Հայաստանում ՄԱԿ-ի մշտական համակարգող, ՄԱԶԾ մշտական ներկայացուցիչ Բրեդլի Բուզետտոն:
«Նորարարությունը Հայաստանի զարգացման, գուցե, լավագույն հնարավորությունն է, որովհետև բնական հարստությունների առումով հնարավորությունները սահմանափակ են, բայց երկիրն ունի հարստություն, որը կարևորագույնն է, դա մարդկային ներուժն է, նրա տաղանդի ու շնորքի դրսևորումները: Ծրագրի շրջանակներում կփորձենք ստեղծել ճիշտ միջավայր, որտեղ նորարարակական գաղափարները կյանքի կկոչվեն: Ծրագիրն ընդամենը մասն է այն մեծ ռազմավարության, որը միտված է ծառայելու Հայաստանի զարգացմանը»,-«Նորարար առաջընթաց» ծրագրի շնորհանդեսին այսօր նշեց Հայաստանում ԵՄ պատվիրակության ղեկավար, դեսպան Պյոտր Անտոնի Սվիտալսկին՝ կարևորելով այս ծրագրում ՀՀ կառավարության ակտիվ մասնակցությունը:
Իր խոսքում ծրագրի կարևորությունն ընդգծեց կառավարության աշխատակազմի ղեկավար-նախարարի առաջին տեղակալ Գուրգեն Դումանյանը:
