Լուսինե Ավանեսյան
«Ռադիոլուր»- Ստեփանակերտ
«Շահում ես դու, շահում է երկիրը» կարգախոսն ունեցող Արցախի ազգային վիճակախաղի կազմկոմիտեն ամփոփել է դեկտեմբերի 28-ին անցկացված երրորդ խաղարկության արդյունքները: Այս տարի վաճառվել էր 94 հազար տոմս`Արցախում, Մայր Հայաստանում եւ Սփյուռքում:
Ըստ «Արցախի ազգային վիճակախաղ» ՓԲԸ տնօրեն Ալեքսանդր Արզումանյանի՝ երրոդ խաղարկության ժամանակ 455 մրցանակ է խաղարկվել, այդ թվում՝ 5 մեկ միլիոն դրամ, տասնյակ գորգեր, տակառիկներով թթի օղի, մեղր։ Այդ ամենը արտադրված է Արցախում: Ընդ որում՝ դրամական խաղարկությանը մասնակցել են միայն Արցախում եւ Հայաստանում վաճառված տոմսերը:
Շահողներն իրենց շահումները կարող են ստանալ հունվարի 11-ից հետո՝ շահած տոմսով եւ անձնագրով ներկայանալով Ստեփանակերտում վիճակախաղի գրասենյակ, Երեւանում ընկերության ներկայացուցչություն: Մանրամասները կան նաեւ «Արցախի ազգային վիճակախաղ»- ի պաշտոնական կայքում:
Ըստ կազմակերպիչների՝ «Շահում ես դու, շահում է երկիրը» կարգախոսով վիճակախաղի յուրահատկությունն այն է, որ այն նպաստում է Արցախում նոր աշխատատեղերի բացմանը, տեղական արտադրանքի խթանմանը:
Ազգային վիճակախաղի նախորդ փուլերի շնորհիվ՝ տնտեսության տարբեր ճյուղերում նոր արտադրողներ են հայտնվել։ Քաշաթաղի շրջանի Իշխանաձոր գյուղում սկսվել եւ արդեն ավարտվում է առանձնատների եւ բազմաբնակարան շենքի շինարարությունը:
Այս տարվա շահույթը հիմնականում ուղղվելու է Քաշաթաղի շրջանում բնակարաններ կառուցելու ծրագրի: Տեղեկացնեմ նաեւ, որ առաջիկա ամսվա ընթացքում շահած եւ չշահած տոմսերով բոնուս խաղարկություն կանցկացվի՝ 92 մրցանակներով:
