Լուսինե Ավանեսյան
«Ռադիոլուր»- Ստեփանակերտ
Ավարտվող տարին այսօր հրավիրված ասուլիսում ամփոփել է Արցախի արտաքին գործերի նախարար Կարեն Միրզոյանը: Ըստ արտգործնախարարի` ադրբեջանա-ղարաբաղյան հակամարտության կարգավորման ուղղությամբ ԵԱՀԿ ՄԽ համանախագահների ջանքերի անարդյունք լինելու հարցում մեղավորը հակառակորդ կողմն է: Լեռնային Ղարաբաղի դիրքորոշումն այդ հարցում մնացել է անփոփոխ` բանակցային գործընթացը պետք է ընթանա Մինսկի խմբի ձեւաչափում՝ Արցախի անմիջական ու լիարժեք մասնակցությամբ։
ԵԱՀԿ ՄԽ համանխագահները Արցախ 2015 թ եկել են երկու անգամ, հանդիպումներ եղել են նաեւ այլ վայրերում: Սակայն դրանք էական առաջընթաց չեն արձանագրել: Ադրբեջանի դիրքորշման հարցում նաեւ մեղքի բաժին ունեն համանախագահները, քանի որ ժամանակին չեն սաստել Բաքվին:
Բնականաբար խոսվեց առաջնագծում լարվածության եւ այդ ֆոնին կարգավորման գործընթացի մասին: Ըստ Կարեն Միրզոյանի՝ հետզհետե իրավիճակը փոխվում է: Արդեն նաեւ միջազգային հանրությունն է պաշտպանում շփման գծում իրավիճակը կայունացնելու հայկական կողմերի կոչերը: Արտգործնախարարը հիշեցրեց սահմանային միջադեպերը հետաքննելու պայմաններ ապահովելու վերաբերյալ ամերիկացի կոնգրեսականների նախաձեռնության մասին:
Ըստ Կարեն Միրզոյանի՝ այդ հարցով Կոնգրեսի արտաքին հարաբերությունների հանձնաժողովում լսումներ են նախատեսվում:
