Քաղաքական

Խորհրդարանից կառավարությունը 324 առաջարկություն է ստացել

lusinevasilyan
Խորհրդարանը շարունակում է այս նստաշրջանի վերջին հերթական քառօրյայի աշխատանքը:  Պատգամավորներըն այսօր քվեարկել են երեկ քննարկված մոտ մեկ տասնյակ օրինագծերն ու վերսկսել  Բյուջեի 2016-ի  նախագծի քննարկումը: Այն ընթացել էր  նախորդ քառօրյայի ընթացում և ընդմիջվել առաջարկությունների ներկայացման համար:

ֆինանսների փոխնախարար Պավել Սաֆարյանը տեղեկացրել է, որ խորհրդարանից կառավարությունը 324 առաջարկություն է ստացել: Դրանցից  16-ը ստացվել է ԱԺ մշտական հանձնաժողովներից, 198-ը՝ խմբակցություններից: 110 առաջարկ էլ ներկայացրել են  անհատ պատգամավորները,  ընդ որում դրանցից   50-ը   եղել են Հրանտ Բագրատյանի առաջարկները: Ամբոջությամբ ընդունվելու դեպքում խորհրդարանի առաջարկները բյուջեի  եկամտային հատվածը կավելացնեին  15,  իսկ ծախսերը ՝ մոտ 14 մլրդ դրամով:

«Նախագիծը իրատեսական է, պետության գործառույթների իրականացման տեսանկյունից հավասարակշռված, կազմված է գլոբալ տնտեսական և տարածաշրջանային իրողություններին համահունչ, այդ իմաստով նաև որոշ չափով հավակնոտ: 2016 թ. բյուջեի կատարումը, չնայած դրա այսպես կոչված համեստ ցուցանիշներին, զգալի ջանքեր կպահանջի կառավարությունից»:

Ֆինանսաների փոխնախարարն անդրադարձել է նաև խորհրդարանում հնչած քննադատությանը, մասնավորապես գնահատականին, որ բյուջեի ցուցանիշները խիստ համեստ են և զարգացման հնրավարություն չեն ընձեռում: Դրանք արտացոլում են մեր երկրի առջև ծառացած տնտեսական, նաև  արտաքին անբարենպաստ գործոններով պայմանավորված խնդիրները՝ ասել է Սաֆարյանը և նշել, որ հաջորդ տարվա բյուջեի կատարումը լուրջ ջանքեր է պահանջելու:

Պատգամավորներն այսօր նաև  ՀՌԱՀ անդամներ են ընտրելու:  Երեկ խորհրդարանն արդեն լսել է թեկնածուներին՝ Կորյուն Առաքելյանին, Հայկ Քոթանյանին եւ Արմեն Մկրտչյանին: Հիշեցնենք՝ Սահմանադրության 83-րդ հոդվածի 2-րդ կետի համաձայն՝ ՀՌԱՀ անդամների կեսը վեց տարի ժամկետով ընտրվում է Ազգային ժողովի կողմից: Ազգային ժողովն այդ մարմնի անդամներին ընտրում է փակ գաղտնի քվերակությամբ,  պատգամավորների ընդհանուր թվի ձայների մեծամասնությամբ:

Քվեարկությունը տեղի կունենա այսօր,  ժամը 13. 30-ին, ԱԺ նիստերի դահլիճին կից նախասրահում:

Back to top button