Նկարները՝ Մեդիա կենտրոնի
«Երկրաշարժի հետևանքով անօթևան մնացած ընտանիքների բնակարանային խնդիրը կլուծվի մինչև 2016 թվականի ավարտը: Քաղաքաշինության նախարարությունն այսպիսով ավարտին կհասցնի աղետի գոտում իրականացվող բնակարանային ապահովման պետական ծրագիրը»,-այս մասին Մեդիա կենտրոնում կազմակերպված մամուլի ասուլիսում այսօր տեղեկացրել է նախարարության բնակարանային քաղաքականության և կումունալ ենթակառուցվածքների վարչության պետ Եվգենյա Աթայանը: Ինչպես եք գնահատում իրականացված ծրագրերը հարցին, մամուլի ասուլիսին Գյումրիից տեսակապով միացած «Շիրակ կենտրոն» ՀԿ-ի նախագահ Վահան Թումասյանի արձագանքը բավականին սուր է եղել:
Ծրագրի շրջանակներում բնակարանների բաշխման գործառույթն իրականացնում է Հայաստանի քաղաքաշինության նախարարությունը՝ առաջնորդվելով համապատասխան համայնքների կողմից հաստատված հերթացուցակներով: Նախարարության բնակարանային քաղաքականության և կումունալ ենթակառուցվածքների վարչության պետ Եվգենյա Աթայանի տվյալներով ծրագրի շահառու ճանաչված 5363 ընտանիքներից 4398 –ի բնակարանային խնդիրն այս պահի դրությամբ լուծված է: Մնացած 965 ընտանիքների խնդիրը նախատեսվում է լուծել մինչև 2016 թվականի ավարտը:
Ինչպես եք գնահատում իրականացված ծրագրերը հարցին, մամուլի ասուլիսին Գյումրիից տեսակապով միացած «Շիրակ կենտրոն» ՀԿ-ի նախագահ Վահան Թումասյանի արձագանքը բավականին սուր էր: Նախ նշեց, որ աղետի գոտու անօթևանների խնդիրն այնքան է սրվել, որ մեկ նախարարության գործառույթի շրջանակներում այն այլևս տեղավորել չի կարելի:
«Երկրաշարժից 27 տարի անց մարդիկ շարունակում են ապրել ծայրահեղ ծանր պայմաններում: Հայասատանը կարող է գրանցվել Գինեսի ռեկորդների գրքում՝ որպես աղետի հետևանքների վերացման ամենաերկարատև ծրագիրն իրականացնող երկիր: Երկորոդ համաշխարհայինի հետևանքների վերացման համար անգամ այդքան ժամանակ չի պահանջվել»,-դառը հումորով նկատում է Վահան Թումասյանը:
Խոսելով նաև թվերի լեզվով, Վահան Թումասյանն արձանագրեց.«Այս պահին միայն Գյումրիում տնակային ծայրահեղ ծանր պայմաններում ապրում է 2700 ընտանիք, որոնցից 1000-ը անօթևանների հերթացուցակներում գրանցված ընտանիքներն են: Հարյուրավոր ընտանիքներ ծրագրից դուրս են մնացել ժամանակին չգրանցվելու, տարբեր չափորոշիչներին չհամապատասխանելու պատճառով, բայց թվերը շարադրելով մարդկանց վիճակը չի փոխվում: Սա սոցիալական պայթյունավտանգ իրավիճակ է»,-ասում է Վահան Թումասյանը:
Արձագանքելով ներկայացրած թվային տվյալներին, քաղաքաշինության նախարարության պաշտոնյան նկատեց, որ վերը նշված 2700 ընտանիքներն անօթևան են դարձել ոչ երկրաշարժի հետևանքով, ուստի ծրագրի շահառուներ չեն համարվում: Իսկ բնակարանային խնդիրը ոչ միայն աղետի գոտում, այլև ողջ հանրապետության ամենացավոտ հիմնախնդիրների շարքում է:
