Լեռնային Ղարաբաղի հակամարտության խաղաղ և բանակցված կարգավորմանն ուղղված ԵԱՀԿ Մինսկի խմբի ձևաչափը հակամարտության կողմերի համար ընդունելի միակ ձևաչափն, որը վայելում է նաև ԵԱՀԿ բոլոր անդամ երկրների վստահությունը: «Արմենպրես»ի փոխանցմամբ՝ Բելգրադում ընթացող ԵԱՀԿ նախարարների խորհրդին նման հայտարարությամբ են հանդես եկել Մինսկի խմբի համանախագահող երկրների պատվիրակությունների ղեկավարները:
Ռուսաստանի Դաշնության արտաքին գործերի նախարար Սերգեյ Լավրովը, ԱՄՆ պետքարտուղար Ջոն Քերին և Ֆրանսիայի Եվրոպական հարցերով պետքարտուղար Հարլեմ Դեզիրը նորից վերահաստատել են ԼՂ հակամարտության խաղաղ կարգավորմանը համատեղ միջնորդելու հանձնառությունը: Նրանք ողջունել են Հայաստանի նախագահ Սերժ Սարգսյանի և Ադրբեջանի նախագահ Իլհամ Ալիևի միջև Մինսկի խմբի համանախագահների հովանու ներքո կայանալիք հանդիպումը:
«Վերջին շրջանում լարվածության աճի հետ կապված մենք հորդորում ենք կողմերին կրկին հանձն առնել հակամարտության խաղաղ կարգավորումը և փարատել բոլոր թյուրըմբռնումները, որ իրենք լուրջ չեն տրամադրված բանակցված կարգավորման հասնելու իրենց մտադրություններում: Կողմերը պետք է շարունակեն դեռևս 2014 թվականին Սոչիում, Ուելսում և Փարիզի գագաթաժողովում սկսված քննարկումները համապարփակ կարգավորման բաղադրիչների շուրջ, և պետք է ակտիվացնեն երկխոսությունը 2016 թվականին՝ այն առաջարկությունների հիման վրա, որ ներկայումս դրված են քննարկման»,- ասվում է նախարարական հավաքի պատվիրակությունների ղեկավարների հայտարարությունում:
ՄԽ համանախագահող երկրների ներկայացուցիչներն ընդգծել են, որ այս տարի բռնությունների զգալի ավելացումը շփման գծում և հայադրբեջանական սահմանում անկայուն է դարձրել ստատուս քվոն: Նրանք հատկապես դատապարտել են ականանետերի և մյուս ծանր զինատեսակների օգտագործումը և ցավակցություն հայտնել դրանց պատճառած քաղաքացիական կորուստների համար։
«Լեռնային Ղարաբաղի հակամարտության կարգավորման համար ռազմական լուծում գոյություն չունի, որևէ բան չի կարող արդարացնել խաղաղ քաղաքացիական անձնաց սպանությունը և վիրավորումները: Մենք խստագույնս կոչ ենք անում կողմերին նվազեցնել լարվածությունը և պաշտպանել բնակիչներին: Համանախագահներն առաջարկել են ռիսկի նվազեցման միջոցառումներ, այդ թվում` ԵԱՀԿ հետաքննչական մեխանիզմներ, որոնք կողմերին կոչ ենք անում ներդնել»:
Ռուսաստանի, Ֆրանսիայի և ԱՄՆ արտաքին քաղաքական գերատեսչությունների ներկայացուցիչները ողջունել են Կարմիր խաչի միջազգային կոմիտեի հովանու ներքո կորած անձանց մասին տեղեկատվության փոխանակման գործում գրանցված առաջընթացը և խրախուսել հետագա համագործակցությունը ԿԽՄԿի հետ:
Ընդգծվել է, որ ԵԱՀԿն պետք է երաշխավորի բավարար ֆինանսավորում այս կարևոր մարդասիրական միջոցառման լիակատար ներդման համար: Համատեղ հայտարարությամբ կոչ է արվել ԼՂ հակամարտության կողմերին ազատ արձակել բոլոր գերիներին, որը համահունչ է 2010 թվականի հոկտեմբերին` Հայաստանի, Ադրբեջանի և Ռուսաստանի Դաշանության նախագահների կողմից ընդունված Աստրախանի հռչակագրի ոգուն:
Հարևան ժողովուրդների միջև փոխվստահության ձևավորման նպատակով շեշտվել է հայերի և ադրբեջանցիների միջև երկխոսության անհրաժեշտությունը: «Վերջին տարվա ընթացքում մենք ականատես եղանք ԵԱՀԿ համանախագահների և Մինսկի խմբի ձևաչափի դեմ ուղղված հարձակումների: Մենք շեշտում ենք, որ ԵԱՀԿ Մինսկի խմբի ձևաչափը հակամարտության կողմերի համար ընդունելի միակ ձևաչափն է, որը վայելում է նաև ԵԱՀԿ բոլոր անդամ երկրների վստահությունը: Բանակցային գործընթացում եղած արգելքների մեջ համանախագահներին մեղադրելու ցանկացած փորձ միայն քողարկում է խաղաղության հասնելու հիմնական խոչընդոտը, այն է` բանակցված կարգավորման հասնելու ոչ բավարար քաղաքական կամքը Հայաստանում և Ադրբեջանում»,- նշվում է հայտարարության ամփոփման մեջ:
