Նոյեմբերի 3-ին Ռուսաստանի Տուլա մարզում Մոսկվա-Երևան երթուղու ավտոբուսի վթարից հետո կարծես թե ոլորտում քայլեր են նախաձեռնվում՝ հետագա նման պատահարները կանխելու համար: ՀՀ տրանսպորտի և կապի նախարարությունը ոչ կանոնավոր ուղևորափոխադրումների ոլորտում նախատեսել է խստացումներ: Սակայն դրանց մեջ չի մտնում ուղևորների ապահովագրումը: Նախարարությունից պնդում են, որ իրենց լիազորություններից դուրս է ուղևորափոխադրում իրականացնող ընկերություններին պարտադրել իրականացնել ուղեւորների բժշկական ապահովագրում:
Վերջերս Տուլայում տեղի ունեցած վթարը կարծես թե սթափեցնում է ոլորտը վերահսկող գերատեսչությանն ու ուղևորափոխադրում իրականացնող ընկերություններին: Ոչ կանոնավոր ուղևորափոխադրումների ոլորտում ՀՀ տրանսպորտի և կապի նախարարությունը նախատեսում է խստացումներ, ուղևորափոխադրում իրականացնող ընկերություններն էլ վստահեցնում են, որ առավել ուշադիր պետք է լինեն ավտոբուսների տեխնիկական վիճակին և սկսելու են հետաքրքրվել ուղևորներին բժշկական ապահովագրմամբ ապահովելու շուրջ:
ՀՀ Տրանսպորտի և կապի նախարարության տրանսպորտի վարչության պետի տեղակալ Դավիթ Մելքոնյանը կանոնավոր ուղևորափոխադրումների դեպքում ուղևորներն ունեն պարտադիր ապահովագրում «Ռադիոլուրի» հարցմանն ի պատասխան նշեց, որ ՀՀ-ում տրանսպորտի ոլորտում ուղևորների պարտադիր ապահովագրում չկա: Դա դուրս է ՀՀ կապի ու տրանսպորտի նախարարության լիազորություններից:
«Դա ավելի շատ ֆինանսական, կենտրոնական բանկի խնդիրն է»:
«Ռադիոլուրը» զրուցեց ուղևորափոխադրում իրականացնող ընկերություններից մեկի տնօրենի հետ, ով նշեց, որ մոտ երեք տարի առաջ ուղևորներին ապահովագրել են, սակայն ֆինանսական խնդիրների պատճառով գործընթացը դադարեցրել են: Ընկերության տնօրեն Մարատ Մովսիսյանի խոսքով՝ ուղևորներն իրենք չեն ցանկացել ապահովագրել իրենց կյանքը:
«Ի՞նչ ֆինանսների մասին է խոսքը: Մեկ ուղևորի համար մոտավորապես 1000-1200 դրամի մասին է խոսքը: Այսօր Ռուսաստան մեկնողները 500 դրամի խնդիր ունեն, իրենք չեն ցանկանում ապահովագրել իրենց կյանքը»:
Ընկերություն, սակայն, վերջին դեպքից հետո արդեն որոշել են ապահովագրական ընկերություններից մեկի հետ կնքել պայմանագիր և այդուհետ ուղևորներին մինչ ավտոբուս նստեցնելը նախևառաջ ապահովագրել նրանց կյանքը: Սա ուղևորների ապահովագրման մասով:
Իսկ ուղևորափոխադրում իրականացնող ավտոբուսների տեխնիկական զննության մասով ՀՀ կապի և տրանսպորտի նախարարության տրանսպորտի վարչության պետի տեղակալը նշեց, որ ոչ կանոնավոր ուղևորափոխադրումների դեպքում ավտոբուսների տեխզննումն իրականացվում է տարեկան մեկ անգամ, իսկ կանոնավոր փոխադրումների ժամանակ տարեկան երկու:
Հասարակական կազմակերպություններն ահազանգում են, որ ուղևորափոխադրում իրականացնող բոլոր փոխադրամիջոցների տեխնիկական զննությունն իրականացվում է ոչ պատշաճ, այսինքն՝ կրում է ձևական բնույթ: Ոլորտի պատասխանատուն էլ նշեց, որ խնդրին ծանոթ են և տեխնիկական զննության գործընթացը կանոնակարգելու նպատակով գերատեսչությունն օրենդրական փաթեթ է ներակայացրել ՀՀ կառավարության քննարկմանը:
Իսկ ուղևորափոխադրումներ իրականացնող ընկերության տնօրենն էլ հակառակն է պնդում : Յուրաքանչյուր ուղերթից առաջ տեխզննումն անպայման իրականացվում է, ասում է:
Քանի որ յուրաքանչյուր պատահար խոսում է տվյալ ընկերության վարկանիշի մասին, ապա ամեն կերպ պետք է վերահսկվեն ավտոբուսները, ասում է ընկերության տնօրեն Մարատ Մովսիսյանը և ավելացնում իրենք ՋԻ ՓԻ ԷՍ համակարգերով վերահսկում են տվյալ երթուղին և խախտումները, տնօրենի ձևակերպմամբ, բացառվում են:
Նշենք նաև, որ ՀՀ ԱԺ Օրինաց երկիր խմբակցությունը ներկայացրել է մի նախագիծ, ըստ որի առաջարկում են հետևելով Վրաստանի փորձին տեխնիկական զննության գործընթացն իրականացնել երեք տարին մեկ, որին սակայն կառավարությունը հավանություն չի տվել:
