Քաղաքական

Խորհրդարանը սկսեց ու ավարտեց երկրորդ արտահերթը

lusinevasilyan

Ձայների 70 կողմ, 14 դեմ եւ 19 ձեռնպահ ձայների հարաբերակցությամբ խորհրդարանն  այսօր արտահերթ նիստում ընդունել է « ՀՀ  վարչատարածքային  բաժանման մասին» օրենքում  փոփոխություններ առաջարկող նախագիծը, որով   նախատեսվում է  խոշորացնել համայնքները:

Քվեարկությունից առաջ ՀԱԿ խմբակցության ղեկավար Լեւոն Զուրաբյանը հայտարարել է, որ նախագիծը խորհրդարանի քննարկմանն է ներկայացվել օրենսդրության պահանջների խախտումներով:  Երեկ, հիշեցնենք,  պատգամավորը հիմնական զեկուցողից՝ Տարածքային կառավարման և արտակարգ իրավիճակների նախարարի առաջին տեղակալ Վաչե Տերտերյանից պահանջել էր  պատգմավորներին  ներկայացվել մայիսի 17-ին անցկացված  հանրաքվեի արդյունքները,  որոնք ցույց են տալիս, թե ինչպես են խոշորացմանը վերաբերում համայքների բնակիչները:

«Կոչ եմ անում գործընկերներիս` քվեարկությունից առաջ ուշադիր լինել այս արդյունքների նկատմամբ, քանի որ այս համայնքների բնակչությունը դեմ է քվեարկել խոշորացման ծրագրին: Կոչ եմ անում՝ հարգել համայնքների բնակիչների կամքը»:

Խորհրդարանն այսօր  ընդունել է նաև երեկ քննարկված այլ նախագծեր ու համաձայնագրեր, և արտահերթ նիստի  ավարտից անմիջապես հետո սկսել երկրորդ արտահերթի աշխատանքը: Այն դարձյալ հրավիրվել է գործադիրի  նախաձեռնությամբ  և  տևել ընդամենը մի քանի րոպե.  առանց հարցերի ու ելույթների  պատգամավորները քննարկել և ընդունել են երկու օրենսդրական նախաձեռնություն:

Դրանք վերաբերել  են առևտրի և ծառայությունների ոլորտին: Կառավարությունն առաջարկում է հացի քաշի նշումը դարձնել պարտադիր, իսկ այն ցույց չտալու դեպքում՝ վարչական պատասխանատվություն սահմանել: Մյուս նախաձեռնությամբ առաջարկվում է այդ ոլորտում աշխատողների  համար  պարտադիր մասնագիտական պատրաստվածություն պահանջող ցանկից հանել  հանել բարմենի և մատուցողի մասնագիտությունները:

Back to top button