ԿարևորՔաղաքական

Գ. Վիգանդ. Հայաստանը ԵՄ թե առեւտրային, թե ներդրումային լավագույն գործընկերներից է (լրացված)

տեղադրված է ժամը 11։48- ին
լրացված է ժամը 15։12- ին

hasmikdilanyan

«ԵՄ -­ն Հայաստանի լավագույն գործընկերներից է թե  առևտրի,   թե ներդրումների բնագավառում»,- Երևանում այսօր մեկնարկած ԵՄ- ՀՀ համագործակցության կոմիտեի 16-րդ նիստի սկզբում հայտարարել է Եվրոպական արտաքին հարաբերությունների ծառայության Ռուսաստանի, Արևելյան գործընկերության, Կենտրոնական Ասիայի, տարածաշրջանային համագործակցության և ԵԱՀԿ հարցերով տնօրեն Գունար Վիգանդը: Քաղաքականից  տնտեսական հարթություն անցնելով՝  Գունար Վիգանդը  նշել է՝  տնտեսական առումով տարածաշրջանի համար մարտահրավեր ներկայացնող այս ժամանակահատվածում ցանկանում են աջակցել Հայաստանում բարեփոխումների իրականացմանը: Նիստի  համանախագահներն են   էկոնոմիկայի նախարար Կարեն Ճշմարիտյանն ու Գունար Վիգանդը:

 

Հայաստան- Եվրամիություն համագործակցության նոր փուլն ազդարարված է: Եվրոպական արտաքին հարաբերությունների ծառայության Ռուսաստանի, Արևելյան գործընկերության, Կենտրոնական Ասիայի, տարածաշրջանային համագործակցության և ԵԱՀԿ հարցերով տնօրեն Գունար Վիգանդի տեղեկացմամբ՝ Եվրամիության Նախարարների կոմիտեի կողմից   Հայաստանի հետ նոր պայմանագրով ու նոր ձևաչափով բանակցելու մանդատ են ստացել:

Եվրոպացի պաշտոնյան նախ հիշեցնում է, որ  ասոցացման համաձայագրի բանակցությունների ընթացում բազմիցս այցելել է Հայաստան, հիշում նաև, որ 2013թ սեպտեմբերին Հայաստանը որոշեց ԵՏՄ –ին անդամակցել, հետո նաև հատուկ ընդգծում է. «Եվրամիությունը հարգում է Հայաստանի՝ Եվրասիական տնտեսական միությանը անդամակցելու ընտրությունը»:

Գունար Վիգանդի խոսքով՝ ՀՀ-ում նախատեսվող Սահմանադրական փոփոխությունների շրջանակներում նաև քննարկվում են ժողովրդավարությանը վերաբերող հարցեր՝ փորձելով անել հնարավորինը՝ փոփոխություններն առավել արդյունավետ անցկացնելու համար:

Քննարկվել են նաև սահմանային միջադեպերին վերաբերող հարցեր. «Մենք ցանկանում ենք սահմաններում կայունության ապահովում»,- հայտարարում է   եվրոպացի պաշտոնյան։ Բացի այդ` Լեռնային Ղարաբաղի հիմնահարցի և Թուրքայի հետ հարաբերությունների առնչությամբ նույնպես  քննարկումներ լինելու են:

Քաղաքականից  տնտեսական հարթություն անցնելով՝  Գունար Վիգանդը  ասում է՝ տնտեսական առումով տարածաշրջանի համար մարտահրավեր ներկայացնող այս ժամանակահատվածում ցանկանում են աջակցել Հայաստանում բարեփոխումների իրականացմանը:

ՀՀ էկոնոմիկայի նախարար Կարեն Ճշմարիտյանի  տեղեկացմամբ՝ բոլոր գերատեսչություններն ունեն առանձին առաջարկներ, որոնք մտադիր են ներկայացնել եվրոպական կողմին, մասնավորապես, գյուղատնտեսության, էներգետիկայի, տրանսպորտի և կապի ոլորտներից:

«Մեր նախարարության կողմից ցանկանում ենք ընդգծել ինովացիոն և փոքր ու միջին ձեռնարկությունների ոլորտում աջակցության ծրագրերի կարևորությունը»,- ասում է Ճշմարիտյանը։

Նախարարի խոսքով՝ մոտ ապագայում կայանալու է Հայաստանի և Եվրամիության միջև «Կոսմե» և «Հորիզոն 2020» համաձայնագրերի ստորագրումը: «Առաջինը սահմանելու է ՓՄՁ աջակցության նոր ուղղությունները, այսինքն` օգտագործելու ենք եվրոպական կողմի հնարավորությունները մեր փոքր բիզնեսի զարգացման առումով, իսկ «Հորիզոն 20 20»­ը ինովացիոն համակարգի հետագա զարգացման լրջագույն ռեսուրս կարող է լինել»,- մանրամասնում է նա։

Հավելեմ նաև, որ չնայած հագեցած ու հետաքրքիր օրակարգին,  ՀՀ- ԵՄ համագործակցության կոմիտեի 16-րդ նիստի աշխատանքներին  լրագրողները հետևեցին միայն բացման ելույթով ու համանախագահներ Կարեն Ճշմարիտյանի ու Գունար Վիգանդի  նախապես լրագրողների հետ կազմակերպված կարճ ելույթով: Բացման խոսքից հետո նիստն իր աշխատանքները դռնփակ շարունակեց:

Կարդացեք նաև
Close
Back to top button