Կանադան կարող է դառնալ «Եվրատեսիլ» երգի մրցույթի նոր մասնակիցը

Կանադան կարող է դառնալ «Եվրատեսիլ» երգի մրցույթի նոր մասնակիցը՝ հնարավոր դեբյուտը կատարելով արդեն 2027 թվականին։ Սակայն երկրի մասնակցության վերաբերյալ պաշտոնական որոշում դեռ չի ընդունվել։

Կանադայի ազգային հանրային հեռարձակող CBC/Radio-Canada-ն Եվրոպական հեռարձակողների միության՝ EBU-ի լիիրավ անդամ է դարձել Պրագայում անցկացված կազմակերպության 96-րդ գլխավոր ասամբլեայում տեղի ունեցած քվեարկությունից հետո։

CBC/Radio-Canada-ն EBU-ի ասոցացված անդամ էր 1950 թվականից և տասնամյակներ շարունակ համագործակցում էր եվրոպական հանրային հեռարձակողների հետ՝ լրագրության, տեխնոլոգիաների և մասնագիտական չափորոշիչների ոլորտներում։

Լիիրավ անդամի կարգավիճակը կանադական հեռարձակողին հնարավորություն է տալիս օգտվել EBU-ի ծառայություններից, մասնակցել կազմակերպության աշխատանքներին և միանալ այնպիսի հարթակների, ինչպիսիք են Eurovision News Exchange-ը և Euroradio Music Exchange-ը։

Նոր կարգավիճակը նաև Կանադայի համար բացում է «Եվրատեսիլ» երգի մրցույթին մասնակցելու հնարավորությունը։ Այդուհանդերձ, լիիրավ անդամակցությունն ինքնին չի նշանակում, որ երկիրը պարտադիր կմասնակցի մրցույթին։ CBC/Radio-Canada-ն առայժմ չի հաստատել 2027 թվականի մրցույթին մասնակցելու ծրագրերը։

Մրցույթին միանալու դեպքում Կանադան կարող է հետևել Ավստրալիայի օրինակին։ Ավստրալիան առաջին անգամ «Եվրատեսիլին» մասնակցել է 2015 թվականին և դրանից հետո դարձել մրցույթի մշտական մասնակիցներից մեկը։