ԱՄՆ նախագահ Դոնալդ Թրամփի հատուկ ներկայացուցիչներ Ջարեդ Քուշները և Սթիվեն Ուիթքոֆը «չեն շտապում» այցելել Կիև, քանի որ Վաշինգտոնը վստահ չէ, որ ԱՄՆ-ի մասնակցությունը Ուկրաինայի դեմ Ռուսաստանի պատերազմը դադարեցնելու բանակցություններին կհանգեցնի ցանկալի արդյունքների, մայիսի 1-ին հայտնել է ուկրաինական անգլալեզու «Կիև Ինդիփենդենթը»՝ հղում անելով աղբյուրներին։
«Նրանք բազմիցս խոստացել են [այցելել Կիև – խմբ.], բայց դեռ չեն արել դա», — լրագրողներին ասել է իրավիճակին ծանոթ ուկրաինացի բարձրաստիճան պաշտոնյան:
Հրապարակման աղբյուրներից մեկի համաձայն, այս այցը նախատեսված էր «որպես կատալիզատոր» Ռուսաստանի, Ուկրաինայի և ԱՄՆ-ի միջև պատերազմը դադարեցնելու եռակողմ բանակցությունների վերսկսման համար, որոնք «էապես փակուղի են մտել»:
Դրանք սառեցվել էին ավելի քան երկու ամիս, քանի որ Միացյալ Նահանգների ուշադրությունն ուղղվել էր Իրանի պատերազմի վրա։
«Կիև Ինդիփենդենթը» գրում է, որ Թրամփի երկու հատուկ դեսպանորդներն էլ «խորապես ներգրավված են ԱՄՆ-Իրան բանակցություններում, որոնք շարունակում են գերիշխել Վաշինգտոնի արտաքին քաղաքականության օրակարգում»։
Միևնույն ժամանակ, պատերազմի սկզբից ի վեր Ուկրաինայի օդային տարածքի փակման պատճառով բանակցողները ստիպված կլինեն գնացքով ճանապարհորդել, ինչը «դժվար է Ուիթքոֆի համար», պնդում է աղբյուրը։
Ամերիկյան կողմի ամենամեծ մտավախությունն այն է, որ հնարավոր այցը «կբացահայտի» բանակցություններում առաջացած փակուղին, որը պայմանավորված է Մոսկվայի և Կիևի կողմից տարածքի վերաբերյալ փոխզիջման հասնելու անկարողությամբ, շարունակում է ԿԻ-ն։
Սպիտակ տան խոսնակը «Կիև Ինդիփենդենթին» ասել է, որ այցը դեռևս քննարկվում է, բայց դրա ամսաթիվը դեռևս որոշված չէ։
Կիևի և Վաշինգտոնի միջև հաղորդակցությունը լիովին չի դադարել։ Ուկրաինացի պաշտոնյան հրատարակությանը հայտնել է, որ իր երկիրը փնտրում է «նոր ձևաչափեր»՝ Միացյալ Նահանգների հետ համագործակցությունը խորացնելու համար։
Ուկրաինայի նախագահ Վոլոդիմիր Զելենսկին մեղադրել է Քուշներին և Ուիթքոֆին Ուկրաինայի նկատմամբ անհարգալից վերաբերմունքի համար:
«Անհարգալից է գնալ Մոսկվա և չգալ Կիև», — ասել է Ուկրաինայի նախագահը ապրիլի 20-ին պետական հեռուստատեսային «Ֆակտի» հաղորդմանը տված հարցազրույցում։
