Ուկրաինային ամերիկյան ՀՕՊ համակարգեր կտրամադրվեն. Թրամփ

ԱՄՆ նախագահ Դոնալդ Թրամփը հայտարարել է, որ ՆԱՏՕ-ի միջոցով Ուկրաինա կմատակարարվի զենք, այդ թվում՝ Patriot ՀՕՊ համակարգեր։

Թրամփը NBC News-ին ասել է, որ նոր համաձայնագրի համաձայն՝ «ԱՄՆ-ն Patriot-ներ կուղարկի ՆԱՏՕ, որից հետո ՆԱՏՕ-ն կբաշխի դրանք», հավելելով, որ ՆԱՏՕ-ն կվճարի զենքի համար։ ԱՄՆ նախագահն այս հայտարարությունն արել է Ուկրաինայի նախագահ Վոլոդիմիր Զելենսկու հետ «դրական երկխոսությունից» հետո։

Patriot մարտկոցները հայտնաբերում և ոչնչացնում են մոտեցող հրթիռները և համարվում են աշխարհի լավագույն ՀՕՊ համակարգերից մեկը։

Հինգշաբթի օրը Հռոմում ելույթ ունենալով՝ Ուկրաինայի առաջնորդը հայտարարել է, որ Գերմանիան պատրաստ է վճարել Patriot-ներից երկուսի, իսկ Նորվեգիան՝ մեկի համար։ Եվրոպացի մյուս գործընկերները նույնպես օգնելու պատրաստակամություն են հայտնել։

Անցյալ շաբաթ Ռուսաստանի նախագահ Վլադիմիր Պուտինի հետ հեռախոսազրույցից հետո Թրամփը հայտարարել էր, որ «դժգոհ է» պատերազմը դադարեցնելու ուղղությամբ արվող քայլերից։

NBC News-ին տված հարցազրույցի ժամանակ Թրամփը հայտարարել է, որ երկուշաբթի օրը Ռուսաստանի վերաբերյալ «կարևոր հայտարարություն» կանի, բայց չի նշել, թե ինչի մասին է այն լինելու։

Նա ասել է, որ «ՆԱՏՕ-ն պատրաստվում է փոխհատուցել Ուկրաինա ուղարկված զենքի ամբողջ արժեքը»։

Զելենսկին կոչ էր արել վերսկսել Patriot համակարգերի մատակարարումները՝ համարելով դրանք «կյանքի իրական պաշտպանություն»։