Ճգնավորի օջախը՝ վերին հարկում․ Օհանավանի «նորահայտ» ժայռափոր համալիրի նոր գտածոները

Տուֆակերտ խորան-աղոթատեղի, ճգնելու համար խորշ, տնտեսական նշանակության կառույցներ, դամբարան․ 2024թ․-ին հայաստանյան հնագիտական բացահայտումներից մեկը դարձավ Արագածոտնի մարզի Օհանավան գյուղի մոտակայքում հայտնաբերված ժայռափոր համալիրը։

Այն հնարավորություն կտա ավելին իմանալ վաղ միջնադարում Քասախի կիրճում ծավալված կրոնական կյանքի մասին։

Համալիրը փոքր ինչ անմատչելի տեղանքում է։ Ամբողջական տեսքով չի ներկայանում, քանի որ տարածքի սեփականատերը տարեսկզբին այն գտել է ժայռը տեխնիկայով փորելու ժամանակ։ «Պատմամշակութային ժառանգության գիտահետազոտական կենտրոն»-ի հնագետ Մհեր Խեչոյանը այդ հանգամանքով է բացատրում այս տարվա պեղումների՝ փրկարարական բնույթի լինելը։