Աիդա Ավետիսյան
«Ռադիոլուր»
Բրիտանական WYG խորհրդատվական ընկերությունը ներկայացրել է Երևանի տրանսպորտային նոր ցանցի վերջնական նախագիծը: Ըստ նախագծի՝ ունենալու ենք միջազգային չափորոշիչներին համապատասխան նոր երթուղային ցանց, որն ունենալու է 47 երթուղի, որից 11 հիմնական երթուղիներ, որոնք շահագործելու են ավտոբուսներով, 30 սնուցող երթուղիներ, որտեղ նախատեսված է շահագործել 7.5-8 և 12 մ երկարությամբ ավտոբուսներ:
Նախատեսվում է ունենալ 5 տրոլեյբուսային և օդանավակայան տանող կանոնավոր երթուղի: Էականորեն նվազելու են ավտոբուսների քանակը, որը, սակայն, չի ազդելու ուղևորահոսքերի վրա, «Ռադիոլուրի» հետ հարցազրույցում ասել է քաղաքապետարանի տրանսպորտի գծով փորձագետ Վազգեն Հարությունյանը: Նոր երթուղային ցանցը նախագծված է՝ հաշվի առնելով ներկայիս ուղևորահոսքը: Դրա համար հիմք է հանդիսացել 2013 թվականի վերլուծությունը:
«Հասարակական տրանսպորտի յուրաքանչյուր երթուղում նստած է եղել մի մարդ, ով հաշվել է մտնող-դուրս եկող ուղևորներին, հաշվարկել քանակը: Դրա հիման վրա իրականացվել է ցանցի նախագծում: 2013 թվականից հետո իրականացվել է կետային ստուգում և արդյունքում ուղևորահոսքի շեղում չի արձանագրվել», -նշել է փորձագետը:
Ցանցը նախագծված է տեղփոխի սկզբունքով, որն ունի նաև տնտեսական մեծ արդյունավետություն: Տեղփոխի սկզբունքը կիրառելու դեպքում բացառելու են զուգահեռ երթևեկող երթուղիները, որը բերում է շահագործման և սպասարկման ծախսերի, ինչպես նաև շարժակազմի քանակի նվազեցման:
«Ուղևորների 45 տոկոսը տեղափոխվելու է առանց տեղփոխ, 37 տոկոսը՝ մեկ տեղփոխով, 15 տոկոսը՝ երկու տեղփոխով, 3 տոկոսը՝ երեք տեղփոխով»,- ասում է Հարությունյանը:
Նախատեսվում է ներդնել միասնական ինտեգրված էլեկտրոնային տոմսային համակարգ, որը հնարավորություն կտա անկախ տեղփոխերի քանակից մեկ անգամ վճարելով կատարել ամբողջ ուղևորությունը: Կլինեն մեկանգամյա, ժամային, ամսական տևողությամբ տոմսեր:
Սակագնի մասով կատարվում են վերջնական հաշվարկները, ասում է քաղաքապետարանի ներկայացուցիչը և հավելում, դրա մասին խոսելը դեռևս վաղ է: Շարժակազմի ձեռք բերելուց հետո կլինեն սակագնի վերաբերյալ պատկերացումները:
Այս պահին քաղաքապետարանն ամեն ինչ անում է, որպեսզի սակագնի բարձրացում չլինի, իսկ լինելու դեպքում չնչին բարձրանա: Տոմսային համակարգում պլանավորվում են լինել նաև արտոնություններ՝ սոցիալապես անապահով ընտանիքների և օրենքով նախատեսված խմբերի համար: Նշված ցանցը նախատեսվում է կյանքի կոչել երկու տարի հետո: Պետք է իրականացվի մրցույթ, արտադրվեն ավտոբուսներ:
