Հանրահայտ ամերիկյան հեռուստաաստղ Քիմ Քարդաշյանի քույրը՝ հայազգի Քլոե Քարդաշյանը, իր պաշտոնական բլոգում երկրպագուներին խորհուրդ է տվել ընթերցել «Հարյուր տարվա զբոսանք. հայկական ոդիսականը» Անահիտ Մակքինի գիրքը:
Հեղինակն այս գրքում օգտվել է իր պապակի՝ Ստեփան Միսկջյանի, գրառումներից: «Այս գիրքը պատմում է պատերազմից փրկված հայ մարդու ճակատագիրը»,- գրել է Քլոե Քարդաշյանը:
Հետաքննող լրագրող Մակքինը ներկայացնում է իր պապի տառապանքները, որ նա կրել է Հայոց ցեղասպանության ժամանակ սիրիական անապատով անցնելիս:
Հիշեցնենք, որ նախորդ տարի՝ Հայոց ցեղասպանության 100-րդ տարելիցին, Քլոե և Քիմ Քարդաշյանները այցելել էին Ցեղասպանության զոհերի հուշահամալիր: Նրանք ծաղկեփունջ էին դրել է 1,5 միլիոն հայերի հիշատակին նիրված հուշարձանին:
Ի դեպ, Հայաստան այցից հետո Instagram-ի իր էջում Քլոեն նման գրառում էր կատարել. «Գիտելիքը ուժ է: Որքան լավ իմանանք, այնքան լավ կգործենք: Ցեղասպանությունները, կոտորածները, մարդկային սպանդը դատապարտելի գործողություններ են: Մեր պարտքն է մարդկանց կրթել և ասել, թե ինչ է տեղի ունեցել պատմության մեջ: Մեր պարտքն է նաեւ բարձրաձայնել բոլոր այն նվաստացումների եւ տառապանքների մասին, որ մարդիկ կրում են՝ անկախ նրանց ռասսայական պատկանելիության ու դավանանքի»:
