Թեեւ երկուշաբթի Աժ-ի հերթական քառօրյա աշխատանք է մեկնարկելու, բայց այսօր սպատգամավորները հավաքվել են խորհրդարանում արտահերթ աշխատանքի: Նախաձեռնությամբ հանդես է եկել Կառավարությունը՝ օրակարգում ներկայացնելով մեկ հարց՝ կատարել լրացում եւ փոփոխություններ «Կառավարության կառուցվածքի մասին» ՀՀ օրենքում: Առաջարկվում է Տարածքային կառավարման եւ արտակարգ իրավիճակների նախարարությունը տարանջատել՝ ստեղծելով երկու առանձին նախարարություն՝ տարածքային կառավարման եւ արտակարգ իրավիճակների: Փոփոխությունների հիմնական նպատակը Աժ-ում ներկայացրել է Արդարադատության նախարար Արփինե Հովհաննիսյանը:
Արփինե Հովհաննիսյան
Հիշեցնենք, որ խոսքը Հանրապետական եւ Դաշնակցություն կուսակցությունների համագործակցության մասին է: 13 պատգամավոր է գրանցվել քննարկվող հարցի առնչությամբ նախարարից պարզաբանումներ ստանալու համար:
Ի սկզբանե քննարկումը թեժ է ստացվել, քանի որ հատկապես Բարգավաճ Հայաստան խմբակցության պատգամավորները չեն ընդունել ներկայացրած հիմնավորումը, որը կապված է քաղաքական համագործակցության հետ եւ Արդարադատության նախարարին հիշեցրել են 2014 թվականի նոյեմբերի 17-ին Աժ-ում այս նույն օրենքում կատարված փոփոխությունը:
Հիշեցնենք, որ այն ժամանակ նույն նախարարությունները միավորվեցին արդյունավետ կառավարման համակարգ ապահովելու եւ օպտիմալացման արդյունքում բյուջեի միջոցները խնայելու համար: Սրան ի պատասխան՝ նախարարը պարզաբանել է, որ տարանջատումը տեղի է ունենալու գոյություն ունեցող ռեսուրսների հաշվին, իսկ քաղծառայողները, ովքեր քննություն են հանձնել եւ ամիսներ առաջ են նշանակվել նշված նախարարություններում՝ օրենքով երաշխիքներ ունեն, որ պահպանելու են իրենց աշխատանքը: Ամեն դեպքում, ԲՀԿ խմբակցության ղեկավար Նաիրա Զոհրաբյանի մտահոգությունները չեն փարատվել:
«Մենք ի՞նչ երաշխիքներ ունենք, որ վաղը կամ մյուս օրը քաղաքական համագործակցության անհրաժեշտությամբ չէր տարանջատի սպորտը երիտասարդությունից, գիտությունը կրթությունից և չե՞ք կարծում, որ սա ի վերջո պետություն է և քաղաքական համագործակցության անհրաժեշտությունները պետք է բխեն պետական շահից»,-ասել է Նաիրա Զոհրաբյանը:
