Կանադայի պաշտպանության նախարար Հարջիտ Սաջջան այսօր ներկա է գտնվել սուրբ Գրիգոր հայ առաքելական եկեղեցում տեղի ունեցած Սուրբ Ծննդյան արարողությանը և իր շնորհակալությունն է հայտնել համայնքին՝ սիրիացի փախստականներին հովանավորելու համար, հայտնում է Global News հեռուստակայանը։
Ռիչմոնդի հայկական եկեղեցին ապաստան է տվել շուրջ 31 ընտանիքի։ «Շատ հեշտ է արագացնել գործողությունները, սակայն շատ դժվար է միավորել ռեսուրսները եւ համայնքը՝ նման ընտանիքներին հովանավորելու համար: Այնպես որ, սա իմ շնորհակալությունը հայտնելու միակ ձևն է»,- լրագրողների հետ հարցազրույցի ժամանակ հայտնել է նախարարը:
Ըստ կազմակերպիչների՝ փախստականներին բնակարաններով ապահովելն ամենամեծ օգնությունն է եղել: «Մենք երեք օր անցկացրեցինք՝ փորձելով վարձակալել ավելի մատչելի բնակարաններ և դա շատ դժվար է: Երբ մարդիկ տեղեկանում են, որ դա մի ընտանիք է՝ բաղկացած մորից, հորից և գուցե երեք երեխաներից, նրանք պարզապես չեն ուզում վարձով տալ բնակարանը եւ, ցավոք, ինչպես մասնավոր հովանավորները, այնպես էլ մենք նահանգային կառավարությունից որեւէ օգնություն չենք ստանում»,- ասել է Վիկ Անտոնյանը, ով Կանադայի Հայ ազգային կոմիտեից է:
Վիգեն Մաջազյանը և Ալին Ազակելյանը իրենց երեխաների հետ հայտնվել էին փախստականների շարքերում և այդ ընտանիքին նույնպես հովանավորել է սուրբ Գրիգոր եկեղեցին: Ազակելյանն ասել է, որ ինքն արդեն հուսահատվել էր: Նա նշել է, որ իրենք շատ վտանգների միջով են անցել: Նա նաև շնորհակալություն է հայտնել բոլորին և նշել, որ հիմա ինքը շատ երջանիկ է:
