Ֆրանսիան չի կարող մասնակցել Բաքվի և Երևանի միջև խաղաղ գործընթացին, հայտարարել է Ադրբեջանի նախագահ Իլհամ Ալիևը «Միջին միջանցքի երկայնքով. աշխարհաքաղաքականություն, անվտանգություն և տնտեսություն» միջազգային համաժողովում, հայտնում է RIA Novosti-ն։
«Պրահայում հանդիպումից մեկ շաբաթ էլ չանցած՝ Ֆրանսիայի նախագահ Մակրոնը հարցազրույցում քննադատել է Ադրբեջանին և մեզ մեղադրել մի բանի մեջ, որը մենք չենք արել։ Դրան հաջորդեց Ֆրանսիայի Սենատի հայտնի բանաձեւը, որը բացարձակապես անընդունելի է եւ վիրավորական։ Հետո եղավ Ֆրանսիայի Ազգային ժողովի հերթական հակաադրբեջանական բանաձեւը, հետո Ֆրանսիայի կողմից Ֆրանկոֆոնիայի գագաթնաժողովի միջոցով մեզ վրա հարձակվելու փորձ։ Դա անընդունելի է, քանի որ Ֆրանկոֆոնիան մարդասիրական կազմակերպություն է»,- ասել է Ալիևը։
Նա ասել է, որ ադրբեջանական կողմն ունի Ֆրանսիայի և Հայաստանի կողմից կազմված բնօրինակ տեքստը, որը, նրա խոսքով, լի է մեղադրանքներով ու ակնարկներով։
«Բայց մենք ընկերներ ունենք ոչ միայն Չմիավորման շարժման մեջ, այլև Եվրոպայում։ Այսպիսով, այս հակաադրբեջանական բանաձեւը ձեւական բան է։ Այս ամենը հաշվի առնելով՝ պարզ է, որ Ֆրանսիան չի կարող մասնակցել խաղաղության գործընթացին։ Եվ սա ոչ թե մերն է, այլ նրանց մեղքը, քանի որ ոչ ԱՄՆ-ն, ոչ Ռուսաստանը երբևէ պաշտոնապես կողմ չեն բռնել։ Սա նշանակում է, որ դեկտեմբերի 7-ի հանդիպումը չի կայանա։ Եվ մենք կդիտարկենք այլընտրանքներ: Տեսնենք, թե ով և ինչ հարթակում հանդես կգա որպես միջնորդ»,- ասել է Ալիևը։
