Օգոստոսի 19-ին Ֆինլանդիայի՝ բնակչության թվով երկրորդ քաղաքը համարվող Էսպուի Սուրբ Հերման եկեղեցու բակում տեղի է ունեցել Ֆինլանդիայում հայկական առաջին խաչքարի օծման և բացման արարողությունը։
Հայաստան-Ֆինլանդիա միության նախաձեռնությամբ հիմնված խաչքարը հեղինակել է հայաստանաբնակ քանդակագործ Հովհաննես Ստեփանյանը։
Միջոցառմանը մասնակցել և ներկաներին ողջույնի խոսք է հղել Հայաստանի Հանրապետության դեսպանության ներկայացուցիչ Հայարփի Դրմեյանը, ով կարևորելով հայ-ֆիննական բարեկամությանը նվիրված խաչքարի բացումը, նշել է, որ կոթողը հետայսու հանդիսանալու է Ֆինլանդիայում հայ համայնքի ներկայության բացառիկ խորհրդանիշը։ Հիշատակելով, որ խաչքարը Հին Ջուղայում Ադրբեջանի կողմից ոչնչացված խաչքարերից մեկի կրկնօրինակն է՝ հայ դիվանագետն անդրադարձել է ավելի քան 8 ամիս շաունակվող Լաչինի միջանցքի շրջափակմանը՝ ընդգծելով, որ Լեռնային Ղարաբաղի հայությունը կանգնած է մարդասիրական աղետի շեմին և միջազգային հանրության համապատասխան քայլերի չձեռնարկման դեպքում ինչպես բնիկ հայությունը, այնպես էլ հայկական ժառանգությունը կարող են արժանանալ Հին Ջուղայի հայության և հայկական մշակութային արժեքների ճակատագրին։
Միջոցառման ընթացքում խոսք են հղել նաև Հայաստան-Ֆինլանդիա միության նախագահ Դանիել Դավթյանը, Հայաստանում Ֆինլանդիայի դեսպան Կիրստի Նարինենը, համայն Ֆինլանդիայի Ուղղափառ եկեղեցու արքեպիսկոպոս Լեո Մակկոնենը, Սուրբ Հերման եկեղեցու հոգևոր հայր Պետրի Կորհոնենը։
Հայաստանյայց առաքելական եկեղեցու Կենտրոնական Եվրոպայի և Շվեդիայի հայրապետական պատվիրակ Տիրան Եպիսկոպոս Պետրոսյանի ձեռամբ տեղի է ունեցել խաչքարի օծման կարգ։ Հայկական երաժշտական կատարումներով հանդես եկավ հայ-ֆիննական «Լույս» (Valo) երգչախումբը։
