Իրանի բանակի ռազմացամաքային ուժերի հրամանատարը հայտարարել է՝ «Ֆաթեհան Խեյբար» կոդային անվամբ Իրանի հյուսիս-արևմտյան տարածաշրջանում զորավարժություն անցկացնելու մասին:
Parstoday.com-ի փոխանցմամբ՝ Իրանի բանակի ցամաքային ուժերի հրամանատար, բրիգադային գեներալ Քիումարս Հեյդարին ասել է. «Ուրբաթ օրը հյուսիս-արևմտյան շրջանում կմեկնարկեն «Ֆաթեհան Խեյբար» զորավարժությունները՝ զրահատանկային, հրետանու, անօդաչու թռչող սարքերի, էլէկտոնային պատերազմի ստորաբաժանումների առկայությամբ և ուղղաթիռների լոգիստիկանակ աջակցությամբ»:
Նա նշել է, որ զորավարժությունները կանցկացվեն ստորաբաժանումների մարտական տեխնիկայի և կարողությունների մի մասի ներգրավմամբ՝ մարտական պատրաստվածության բարձրացման նպատակով:
Իրանի բանակի ցամաքային ուժերի հրամանատարը հավելել է.«Այս տարածաշրջանում և երկրի տարբեր մասերում զինված ուժերի վարժանքներն իրականացվում են ճշգրիտ պլանավորման և օրացուցային ծրագրի համաձայն, իսկ ստորաբաժանման վարժանքների նպատակն է զենքի, սարքավորումների փորձարկումն ու զինված ուժերի մարտական պատրաստվածության գնահատումը Իրանի աշխարհագրության ու սահմանների յուրաքանչյուր բաժնում»:
