Հասմիկ Դիլանյան
«Ռադիոլուր»
Գեղարքունիքի մարզի Գեղհովիտ համայնքում նախօրեին գրանցված սիբիրյան խոցը միակ դեպքն է՝ «Ռադիոլուր»-ի հետ զրույցում հայտնել է Սննդամթերքի անվտանգության տեսչական մարմնի ղեկավար Գեորգի Ավետիսյանը: Նա տեղեկացրել է, որ սիբիրյան խոցի դեմ կենդանիները պատվաստվում են պետպատվերի շրջանակներում: Իսկ ահա աֆրիկյան ժանտախտի դեմ պատվաստանյութ դեռ չի հայտնաբերվել: Հանրապետությունում, ըստ տեսչական մարմնի ղեկավարի, աֆրիկյան ժանտախտի դեպք չի գրանցվել: Տավուշի մարզում, մինդեռ, հակառակ պնդումները կան:
Հողային վարակ, որը շատ մեծ տարածում չի ունենում: Սննդամթերքի անվտանգության տեսչական մարմնի ղեկավար Գեորգի Ավետիսյանի տեղեկացմամբ, սիբիրյան խոցով վարակվում են չպատվաստված կենդանիները: Հայաստանում պետպատվերի շրջանակներում կենդանիները անվճար են պատվաստվում: Գեղարքունիքի մարզում օրերս սիբիրյան խոցի դեպք գրանցվեց Գեորգի Ավետիսյանը վստահեցնում է. «Սա սիբիրյան խոցի՝ հանրապետությունում գրանցված միակ դեպքն է: Ոչ այդ համայնքում, ոչ էլ մյուս մարզերում դեպքեր չկան»:
Կոնկրետ այս դեպքում անասնատերը հրաժարվել է պատվաստումից: Դրա համար նա պատճառ է ունեցել. «Կենդանին հղի է եղել, իսկ հղիության ու հյուծվածության ժամանակ սիբիրյան խոցի պատվաստումը չի թույլատրվում կամ չի խրախուսվում»:
Գեղարքունիքի մարզի Գեղհովիտ համայնքի ղեկավար Վարդան Պողոսյանի փոխանցմամբ, հիվանդանոց տեղափոխված հինգ գյուղացիների վիճակը լավ է, երկու օրից նրանք դուրս կգրվեն հիվանդանոցից. «Մի երինջ է եղել, փաստորեն հիվանդ, որի մասին տերը չի իմացել: Մորթել է՝ չհասկանալով, որ վտանգավոր է: Մորթելու ժամանակ ով հետը շփվել էր, հիվանդացել է: Մեր գյուղում ընդհանրապես նման բան չի եղել»:
Եթե սիբիրյան խոցի դեմ պատվաստանյութ կա, ապա խոզերի աֆրիկյան ժանտախտի դեմ ոչ միայն Հայաստանում, այլ ընդհանրապես պատվաստանյութ չկա,՝ ասում է Սննդամթերքի անվտանգության տեսչական մարմնի ղեկավար Գեորգի Ավետիսյանը:
Տավուշի մարզի Աչաջուր համայնքում, սակայն, պնդում են ՝ աֆրիկյան ժանտախտ կա: Համայնքի բնակիչ Գեղամ Քոքոբելյանը անասնագոմն է ցույց տալիս, որտեղ 4 տարի առաջ ընտանիքով խոզեր էին պահում: Անցյալ տարվա նոյեմբերին 92 գլուխ խոզը մեկ շաբաթում կորցրեց: Կորցրեց ներդրված 40 հազար դոլարը, սակայն աֆրիկյան ժանտախտը չհաստատվեց. «Ընտանիքով գործ էինք անում, վերջին արդյունքն էլ էս ա: Խոզերը սատկել են, նայողներն ասել են , որ աֆրիկյան ժանտախտ ա: Բայց չհաստատվեց, պատասխան էլ չեկավ»:
Աչաջուր համայնքի ղեկավարի տեղակալ Արարատ Գասպարյանն ու համայնքապետարանի աշխատակազմի քարտուղար Յուրի Միրզոյանը պնդում են՝ խոզերը աֆրիկյան ժանտախտից են սատկում:
Սննդամթերքի անվտանգության տեսչական մարմնի ղեկավար Գեորգի Ավետիսյանը «Ռադիոլուր»-ին վստահեցրեց. «Աֆրիկյան ժանտախտի գրանցված դեպք չունենք: Սա միակ հիվանդությունն է, որը կառավարության որոշմամբ, փոխհատուցվում է: Իսկ խոսել աֆրիկյան ժանտախտի մասին միայն փոխհատուցման համար, առնվազն, անլուրջ է»:
Բագրատաշենի մաքսակետը մեզ մոտ է՝ ասում է Տավուշի փոխմարզպետ Թաթուլ Ստեփանյանն ու հավելում՝ հենց այս պատճառով է մարզը խոցելի: Այստեղ լուծում գտել են, ցանկանում են պայմանական ձևակերպմամբ այս կամ այն երկրից ներկրվող կենդանիների համար տարածք ունենալ, ստուգել կենդանուն, նոր միայն թողնել Հայաստան.
«Մարզում իհարկե խնդիր կա, 2007թ օգոստոսի 2-ին հիվանդությունն արձանագրվել է, մինչև հիմա մեր մարզն այդ հիվանդության նկատմամբ ազատ գոտի չի ճանաչվել: Սա նշանակում է, որ խնդիր է, ոնց կարող է չլինի»:
Ստեփանյանը վստահ է՝ բոլոր խնդիրները կլուծվեն, երբ Հայաստանում գյուղատնտեսության ապահովագրության ինստիտուտը ներդրվի:
