Մրցանակ ոչ այնքան գրողների, որքան՝ ընթերցողների համար. հայտնի են 2015- ի գրական մրցանակակիրները
Հայաստանի գրողների միությունն այսօր 2015 թվականի ամենամյա մրցանակի դափնեկիրներին է հանձնել դասականների անունները կրող մրցանակները: Գրողների միության նախագահ Էդուրադ Միլիտոնյանը նշել է, որ այս մրցանակներն անհրաժեշտ են ոչ այնքան գրողին, որքան ընթերցողին:
Սուսաննա Հարությունյան, Դավիթ Հովհաննես, Սամվել Բեգլարյան, Կարինե Խոդիկյան, Ֆելիքս Բախչինյան, Հռիփսիմե. նրանք են 2015- ի գրական մրցանակակիրները:
Գրողների միության նախագահ Էդուարդ Միլիտոնյանը նախ շնորհավորեց դափնեկիրներին, այնուհետև շեշտեց, որ այս մրցանակները հարկավոր են ոչ այնքան գրողին, որքան ընթերցողներին: «Ընդհանրապես՝ մեր ընթերցողներն ուշադրություն կդարձնեն հեղինակին, գրքին, մանավանդ այսօր, երբ խառնվել են արժեքները»։- ասաց։
Անցյալ տարի հիշատակվեց Հայոց ցեղասպանության 100-րդ տարելիցը, որն իր արձագանքը գտավ նաեւ հայ գրողների ստեղծագործություններում։ Արձակագիր Սուսաննա Հարությունյանի «Ագռավները Նոյից առաջ» վեպը, որն այսօր արժանացավ Դերենիկ Դեմիրճյանի անվան մրցանակի, հեղինակի մոտ 8 ամսվա աշխատանքի արդյունք է: Սա ևս ցեղասպանությանը նվիրված և հայոց ցավի մասին է: Սակայն այս մեկը շատ ստեղծագործություններից տարբերվում է նրանով, որ հեղինակի կենսագրականը ստեղծագործության հիմքը չէ:
«Կոլաժային կերպարներ են, որտեղ դեպքերի մի մասը վերցված է 1915 թվականի տարիների արտագաղթածների կյանքից, մի մասը՝ Ադրբեջանից գաղթածների կյանքից: Կարծում եմ՝ հետաքրքիր վեպ է ստացվել: Կարծում եմ դուր կգա ընթերցողին, չնայած որ տխուր թեմա է»։
Մյուս դափնեկիրներից Սամվել Բեգլարյանի «Արջաորսի այբուբենը» հրապարակախոսություն է, որն էլ արժանացավ Միքայել Նալբանդյանի անվան մրցանակի։ Այն ներկայացնում է Հայաստանը աշխարհացունց երկրաշարժից մինչև սահմանային 2015- ի միջադեպերը։ Տավուշի մարզի Նոյեմբերյան քաղաքում բնակվող հեղինակը նշում է. սահմանամերձ գյուղում թշնամու կրակոցների տակ ծնված գրքում հայոց աշխարհի վերջին 25 տարիների կյանքն է ներկայացնում։
Միության նախագահության ամենամյա մրցանակը ստանալուց զատ, գրողին հանձնվեց նաև նախորդ տարի մշակույթի նախարարության կողմից գրական և մշակութային գործունեության համար արժանացած «Գրիգոր Նարեկացի» հուշամեդալը: Դափնեկիրները փաստեցին՝ հաճելի է, երբ աշխատանքդ գնահատվում է, ինչն էլ մղում է գրական նոր ստեղծագործությունների լույս աշխարհ գալուն: