Միխայիլ Սահակաշվիլիին այսօր պաշտոնապես մեղադրանք առաջադրվեց: Վրաստանի նախկին նախագահին, ով 2013 թվականի նոյեմբերից մշտական բնակություն է հաստատել արտասահմանում, հայրենիքում մեղադրում են պաշտոնեական դիրքը չարաշահելու մեջ: Դատախազության համապատասխան որոշումն այսօր Թբիլիսիում հանձնվել է Սահակաշվիլիի փաստաբան Օտար Կախիձեին:
Ըստ մեղադրանքի, խոսքը 2007 թվականի նոյեմբերի 7-ին խաղաղ ցույցը ուժի կիրառմամբ ցրելու, ինչպես նաև նույն օրը «Իմեդի» հեռուստաընկերություն ապօրինի ներխուժման մասին է՝ գործարար Բադրի Պատարկացիշվիլիի ունեցվածքին տիրանալու նպատակով: Սահակաշվիլիին սպառնում է մինչև ութ տարվա ազատազրկում: Ինքը նախկին նախագահը Թբիլիսի հարցաքննության գալ չի պատրաստվում և մեղադրանքները այսօր իր Ֆեյսբուքյան էջում անվանել է քաղաքական:
