Արմավիրի մարզի Խոյ համայնքում մարզական կյանքը զարգացնելու նպատակով փոխըմբռնման հուշագրեր են կնքվել մենամարտային մարզաձևերի մի քանի ֆեդերացիաների հետ, որոնք գործում են համայնքի 17 բնակավայրերում: Այդ մարզաձևերում համայնքի մարզիկներն արդեն հաջողություններ են գրանցել, իսկ համագործակցությունը, հույս ունեն, միջազգային հարթակներ դուրս գալու լայն հորիզոններ է բացելու:
Խոյ համայնքի 17 բնակավայրերում մարզական 18 խմբակ է գործում, որտեղ մարզվում է շուրջ 350 երեխաներ: Բացի Հայթաղ գյուղի ֆուտբոլի Սալմաստ ակումբից՝ մյուս մարզաձևերը մենամարտային են՝ «Ազատ ոճի ըմբշամարտ», «Արմֆայթինգ», «Դուքենդոյ», «Թեքվոնդո», «Մուայ թայ» և այլն: Այս մարզաձևերում Խոյ համայնքի մարզիկները մարզային ու հանրապետական տարբեր առաջնություններում հաջողություններ են գրանցել: Կարեն Բեյբությանը «Կարատե Դո» մարզաձևի մարզիչ է, աշխարհի գավաթի բրոնզե մեդալակիր:
«Պարբերաբար մարզումներ ենք անցկացնում, միջազգային հաջողություններ ունենք գրանցած, Հայաստանի բազմակի չեմպիոններ ունենք: Օգոստոսի 5-ին Երևանում տեղի ունեցան «Կարատե Դո» մարզաձևի միջազգային առաջնության մրցումներ, որին մասնակցում էին ինը երկրների մարզիկներ, և մենք ունեցանք 2 ոսկե, 1 արծաթե և 1 բրոնզե մեդալներ, որից՝ երկուսը Խոյ համայնքի Ծիածան բնակավայրից՝ 1 ոսկե և 1 բրոնզե մեդալակիրներ: Ի դեպ, կարատեն արդեն համարվում է օլիմպիակամ մարզաձև»:
Կարեն Բեյբությանը հույս ունի առաջիկայում իր սաներին տեսնել օլիմպիական բարձունքներում: Համայնքի Ծաղկունք, Ջրարբի և Ջրառատ համայքններում «Արմֆայթինգ» մենամարտային մարզաձևն է զարգացնում Վարդան Պողոսյանը: Նրա սաները քայլ առ քայլ մոտենում են չեմպիոնների աստիճանահարթակին: Ծաղկունք գյուղից 15-ամյա Նարեկ Վասիլյանի համար սպորտը դարձել է ապրելակերպ.
«Սպորտը ոչ միայն մարզում, այլև դաստիարակում է ու կյանքում ավելի շատ բաներ սովորեցնում: Ես անցած տարի Արմավիրի մարզի չեմպիոն եմ դարձել»:
Մարզական կյանքում ավելի մեծ հաջողությունների հասնելու նպատակով Խոյ համայնքը նախաձեռնել էր սերտորեն համագործակցել մարզական ընկերությունների հետ և բարձրացնել համայնքի սաների մարզական վիճակը, ներգրավել հանրապետական ու միջազգային առաջնություններում: Համայնքի ղեկավար Արգիշտի Մեխակյանը փոխըմբռնման հուշագրեր է ստորագրել «Գրեփլինգի», «Արմֆայթինգի» «Դուքենդոյի» «Թեքվոնդոյի» «Մուայ թայի» ֆեդերացաիների նախագահների հետ: Համայնքի ղեկավարի խոսքով՝ այս համագործակցությամբ նոր փուլ է սկսվում համայնքի մարզական կյանքում։
«Նպատակն ու էությունը՝ ավելի ակտիվացնել սպորտային կյանքը, ավելի մասայական դարձնել առողջ ապրելակերպը, բացահայտել երիտասարդների ներուժը համայնքում և իրականացնել փորձի փոխանակում: Ջատագովը լինենք առողջ ապրելակերպի և շատ երեխաներ ներգրավենք սպորտում: Ինչպես գիտենք, սպորտը ոչ միայն առողջ ապրելակերպ է, այլև կենսակերպ, կարգուկանոն, թիմային աշխատանք»:
Ամռանը «Գրեփլինգ» մարզաձևում պատանիների աշխարհի առաջնությունում բրոնզե մեդալակիր է դարձել նաև արմավիրցի մարզիկը՝ ասում է ֆեդերացիայի նախագահ Սարգիս Բազինյանը։
«Այդ կապակցությամբ ֆեդերացիան աշխատանքներ է տանում, և մեր 5-ամյա ծրագրում ներառված է նաև Արմավիրի մարզը: Մեծ հավանականություն կա, որ առաջիկայում կունենանք աշխարհի փոխչեմպիոններ ու չեմպիոններ»:
Համայնքապետարանը մարզական խմբակներին նվիրել է մարզական գույք: Հայթաղի «Սալմաստ» ֆուտբոլային թիմի երեխաները ոգևորված են, նոր գնդակներ են ստացել: Աշոտ Նիկոյանը որոշել է ֆուտբոլիստ դառնալ։
«Պիտի լավ մարզվենք, դա շատ կարևոր է, լավ խաղանք, որ մեզ լավ առաջարկներ անեն ու ֆուտբոլի տարբեր առաջնությունների մասնակցենք»:
Հայթաղի «Սալմաստ» ֆուտբոլային ակումբ հաճախող մի քանի երեխաներ, այդ թվում Աշոտ Նիկոյանը որոշել են մարզվել մասնագիտացված ֆուտբոլային ակումբերում և բարձրացնել իրենց մարզական վարկանիշը:
Պատանի մարզիկների համար սպորտը ոչ միայն առողջ ապրելակերպ է, այլև կենասակերպ, որը կոփում է մարմինը, բնավորությունը և լավ քաղաքացի կրթում:
