Ազգային վիճակագրական ծառայությունն ամփոփել է այս տարվա անցած յոթ ամիսների նախնական տնտեսական ցուցանիշերը: Թվերը խոսում են արդյունաբերական արտադրանքում, ներմուծման ու արտահանման ցուցանիշերում, ինչպես նաև ծառայությունների ոլորտում երկնիշ աճի մասին: Փորձագետները, սակայն, կարծում են, որ մակրոտնտեսական ցուցանիշերի նկատմամբ հավատն ավելի շատ ոչ թե թվերից է կախված, այլ՝ հասարակության ու տնտեսվարողի կյանքում տեղի ունեցող դրական փոփոխություններից, որոնք այս պահին դեռ չեն նշմարվում:
Մոտ մեկ ամսից կլրանա Կարեն Կարապետյանի պաշտոնավարման մեկ տարին: Փորձագետները գնահատականներ դեռ կտան, կփորձեն հասկանալ՝ տնտեսական ինչ փոփոխություններ կատարվեցին անցած մեկ տարվա ընթացքում: Իրականացվող փոփոխությունների հիմնական, այսպես ասենք, արտահայտիչ ուժը թվերն են, այս դեպքում ՝ պաշտոնական վիճակագրությունը: Թվային հարթությունում դրանք, ի դեպ, հուսադրող են:
Ինքը՝ Կարեն Կարապետյանը, տնտեսական կյանքում տեղի ունեցող փոփոխություններին հաճախ է անդրադառնում, խոսում ներդրումներից՝ ու ոչ միայն: Օրերս կառավարության ղեկավարը ԱՎԾ առաջին յոթ ամիսների վիճակագրությունը ներկայացրեց. «Ընթացիկ տարվա առաջին 7 ամիսների ընթացքում Հայաստանում արձանագրվել է 6,2 տոկոս տնտեսական ակտիվության աճ, 12,7 տոկոսի աճ՝ արդյունաբերության, 21,6 տոկոսի՝ արտահանման, 28,5 տոկոսի աճ՝ ներմուծման ոլորտներում»։
Գործատուների հանրապետական միության նախագահ Գագիկ Մակարյանը վստահ է՝ թվերը տնտեսությունում փոփոխություններ կբերեն: Արտահանման ծավալների աճի հետ կապված զրուցակիցս խնդիրներ չի տեսնում: Արտահանումն իսկապես ավելացել է, թվերը իրականությանը համապատասխանում են:
Արտահանման ծավալների աճին նպաստել է նաև ՌԴ տնտեսության աշխուժացումը: Հանքարդյունաբերական արտադրանքի արտահանումն իհարկե արտահանման ծավալների աճին նպաստել է: Տնտեսագետ Մեսրոպ Առաքելյանը նշում է՝ աճը հիմնականում հանքարդյունաբերության ոլորտի հաշվին է գրանցվել:
Զրուցակիցս նկատում է Հայաստանն ունի այն տնտեսությունը, որը տասնամյակներ շարունակ է ունեցել: «Արդյունաբերական ապրանքները կարող են ավելանալ»,- ասում է Գործատուների հանրապետական միության նախագահ Գագիկ Մակարյանն ու պարզաբանում՝ գործարար միջավայրն ավելի բարենպաստ է դարձել, ՊԵԿ-ի ստորաբաժանումներում էլ կոռուպցիոն ռիսկերը փոքր- ինչ նվազել են: Մակարյանը հիշեցնում է կառավարության թեթև արդյունաբերության ոլորտին տրամադրվող սուբսիդավորվող վարկերի մասին:
Տնտեսագետ Մեսրոպ Առաքելյանը նույնպես որոշակի քայլեր նկատում է, սակայն, պաշտոնական վիճակագրությանը հղում անելով նշում է՝ այս քայլերը աղքատությունը կկրճատեն՝ բայց շատ քիչ տոկոսով:
Տնտեսագետը հիշեցնում է 2016- տնտեսական բարդ ժամանակաշրջանը, նշում է, որ իրավիճակը վատթարացավ հատկապես հուլիս –օգոստոսին, ուստի առաջիկա ամիսներին տնտեսական ցուցանիշերը ավելի բարձր կլինեն: «Համադրել միայն 2016-ի հետ ճիշտ չէ»՝ ասում է:
Ի վերջո, թե Գագիկ Մակարյանը, և թե Մեսրոպ Առաքելյանը կարծում են, որ 6 տոկոս տնտեսական ակտիվության ցուցանիշը շարքային քաղաքացու կյանքում դեռ ոչինչ չի փոխել՝ չնայած նախանշված 3,2 տոկոս տնտեսական աճ ապահովելը այնքան էլ բարդ չի լինի:
Մեսրոպ Առաքելյանը չի մոռանում ընդգծել՝ մակրոտնտեսական ցուցանիշերի նկատմամբ հավատն ավելի շատ ոչ թե թվերից է կախված, այլ՝ հասարակության ու տնտեսվարողի կյանքում տեղի ունեցող դրական փոփոխություններից, որոնք այս պահին դեռ չեն նշմարվում:
