Հայ բնապահպանները նամակով դիմել են վարչապետին՝ ակնկալելով վերջինի պարզաբանումները իրանական լրատվամիջոցներում հայտնված տեղեկատվության վերաբերյալ, որի համաձայն Ուրմիա լճի բնապահպանական խնդիրները լուծելու համար Սևանա լճից ջուր կտարվի Իրան: Հիշեցնենք, որ լրագրողների հարցին ի պատասխան Հայաստանի բնապահպանության նախարարն օրերս այս տեղեկատվությունը որակել էր անհեթեթություն և վստահեցրել, որ իրանական կողմի հետ նման համաձայնություն չկա: Պատասխանը բնապահպանների կասկածները չի ցրել:
Իրանական լրատվամիջոցների տեղեկատվության համաձայն՝ Իրանի պատգամավորներից մեկը հայտարարել է, որ Ուրմիա լճի բնապահպանական աղետը կանխելու համար Հայաստանից և Վրաստանից ջուր կմղվի Իրան: Հայաստանից կտարվի Սևանի ջուրը: Հայաստանի բնապահպանության նախարար Արամայիս Գրիգորյանն օրերս հերքեց այս տեղեկատվությունը՝ այն որակելով անհեթեթություն: Նման համաձայնագրի գոյությունը, սակայն, հաստատել է վրացական կողմը, ինչն էլ հարուցել է հայ բնապահպանների կասկածամտությունը:
Պարզաբանումներ ստանալու նպատակով Հասարակական էկոլոգիական դաշինքն ու Օրհուսի կենտրոնները նամակով դիմել են հանրապետության վարչապետին: Բապահպան Սիլվա Ադամյանն ասում է, որ վարչապետի արձագանք դեռ չեն ստացել, սակայն ունեն տեղեկատվություն, որ նման քննարկումներ, այդուամենայնիվ, եղել են
Բնապահպան Ինգա Զարաֆյանն անգամ կասկած չունի, որ հայ-իրանական կողմերի միջև նման բանակացություններ ընթացել են: «Ժամանակ առ ժամանակ մեր իշխանությունները փորձում են ստանալ Իրանի քաղաքական աջակցությունը Հայաստանի ռեսուրսների հաշվին, որոնք առանց այդ էլ սուղ են»,- ասում է Ինգա Զառաֆյանը:
Նա այսօր հանդես եկավ հայտարարությամբ , որը առավելապես ուղղված էր իրանական կողմին. «Նման համաձայնագիրը առանց հասարակության համաձայնության իրավական ուժ չի ունենա»:
Սիլվա Ադամյանի ձևակերպմամբ՝ Սևանն այսօր ինքն է կանգնած բնապահպանական խնդրի առջև, ջրի տակ մնացած շինություններ, կեղտոտ լողափեր: Սևանը դարձել է ոռոգման աղբյուր: Լճի ջուրն անխնա օգտագործվում է, ասում է բնապահպանը
