Եզդիների ցեղասպանությունը շարունակվում է, իսկ եզդիական փախստականների ճամբարները գտնվում են այնպիսի վայրերում, որտեղ ոչ միայն լավ չեն վերաբերվում, այլև նրանց ֆիզիկական գոյությունն է հարցականի տակ, այսօր հայտարարել են «Շամս» մարդասիրական հասարակական կազմակերպության նախագահ Ռուստամ Բաքոյանը և Եզդիների ազգային կոմիտեի փոխնախագահ Սաշիկ Սուլթանյանը։ Նրանք նշել են, որ քրդերրի նպատակն է նման վայրագությունների միջոցով դատարկել եզդիաբնակ շրջանները: Միևնույն ժամանակ՝ նրանց համար անհասկանալի է քաղաքակիրթ աշխարհի անտարբերությունն այս շարունակական հալածանքների նկատմամբ։
Շուրջ մեկ տարի է՝ եզդի ազգաբնակչության նկատմամբ իրագործվող ցեղասպանությունը չի դադարում: Հանգիստ չունեն անգամ վերապրած եզդիները, ովքեր փախստականների ճամբարներում պայքարում են գոյատևման համար, ներկայացնելով ազգային փոքրամասնության ներկայիս իրավիճակը, նշեց Եզդիների ազգային կոմիտեի փոխնախագահ Սաշիկ Սուլթանյանը:
Եզդիական ճամբարներից պարբերաբար տեղեկանում ենք, որ քրդական իշխանությունները մեծ ճնշումներ են գործադրում փախստական եզդիների վրա, նրանց անգամ ստիպում են կրոնափոխ լինել, նշեց «Շամս» մարդասիրական հասարակական կազմակերպության նախագահ Ռուստամ Բաքոյանը:
Սաշիկ Սուլթանյանը հայտնեց, որ այս ամենից բացի եզդի ազգաբնաչության համար վիրավորական է հատկապես միջազգային հանրության արձագանքն ու անտարբերությունը:
Սաշիկ Սուլթանյանն ու Ռուստամ Բաքոյանն անդրադարձան նաև հայաստանյան իրադարձություններին, Սահմանադրական բարեփոխումներին և դրանց ազդեցությանը եզդի համայնքի վրա: Նրանք նշեցին, որ Սահմանադրական բարեփոխումների կարիք որպես այդպիսին չկար:
Ի վերջո՝ պետք է հասկանալ մի պարզ ճշմարտություն. ազգային փոքրամասնությունները առաջին հերթին ՀՀ քաղաքացիներ են, նկատեց Եզդիների ազգային կոմիտեի փոխնախագահ Սաշիկ Սուլթանանը:
