ՀՀ տարածքային կառավարման եւ արտակարգ իրավիճակների նախարար Արմեն Երիցյանը մարզպետ Ֆելիքս Ցոլակյանի ու մարզի փրկարարական վարչության պետ Մարատ Սարիբեկյանի ուղեկցությամբ ծանոթացավ Ճգնաժամային կառավարման նորակառույց կենտրոնի տեխնիկական հնարավորություններին:
Ճգնաժամային կառավարման կենտրոնի օդերևութաբանական համակարգը կանխատեսում է մարզի եղանակային պայմանները, հնարավորություն է ընձեռում գրանցելու մարզի սեյսմիկ ակտիվությունը: Շտապբուժօգնության ու փրկարարական մեքենաներին էլ օպերատորները կուղղորդեն GPS համակարգի ու էկրանների օգնությամբ:
Շիրակի մարզի ճգնաժամային կենտրոնին ծանոթանալուց հետո Արմեն Երիցյանը շտապեց մարզպետարան՝ հանդիպելու մարզի համայնքների ղեկավարների հետ: Մարզպետարանի համապատասխան ոլորտների պատասխանատուներն ու համայնքապետերը ներկայացրին իրականացված աշխատանքներն ու մարզում առկա խնդիրները:
Նախարարն էլ հորդորեց գյուղապետերին վերացնել համայնքների ու նախարարության միջև առկա անդունդը և դասակարգելով առաջնային լուծում պահանջող խնդիրները՝ նախարարության աջակցությամբ միահամուռ ուժերով ձեռնամուխ լինել դրանց լուծմանը:
