Նորապատի գյուղատնտեսական սպասարկման կենտրոնը կտրամադրի վարկեր, կվաճառի գյուղտեխնիկա, կիրականացնի փորձի փոխանակում
ԱՄՆ միջազգային զարգացման գործակալության ֆինանսավորմամբ «Գործընկերություն հանուն գյուղական համայնքների բարգավաճման» ծրագրի շրջանակում այսօր Արմավիրի մարզի Նորապատ գյուղում բացվել է գյուղատնտեսական սպասարկման կենտրոն: Նոր տեխնոլոգիաների միջոցով կենտրոնը նպաստելու է ֆերմերային գործարարության զարգացման փորձի տարածմանը: Կենտրոնի բացմանը ներկա էին ՀՀ-ում ԱՄՆ արտակարգ և լիազոր Ռիչարդ Միլսը, գյուղնախարար Սերգո Կարապետյանը:
Գյուղատնտեսության մեջ նոր տեխնոլոգիաների ներդրումն ու կիրառումը նպաստում է գյուղմթերքների արտադրողականության և որակի բարձրացմանը, ծավալի ընդլայնմանը: ԱՄՆ միջազգային զարգացման գործակալության «Գործընկերություն՝ հանուն գյուղական համայնքների բարգավաճման» ծրագրի նպատակն է հզորացնել Հայաստանի գյուղական համայնքները, օժանդակել համայնքային նոր ենթակառուցվածքների ստեղծմանը, նվազեցնել մարդկային գործունեության բացասական ազդեցությունը շրջական միջավայրի վրա, ինչպես նաև ստեղծել նոր աշխատատեղերի հնարավորություն կանանց և երիտասարդների համար:
Գյուղնախարար Սերգո Կարապետյանը կարևորեց նմանատիպ կենտրոնների ստեղծումը հանրապետության մարզերում, հատկապես՝ հեռավոր շրջաններում: Մարզերում ստեղծված գյուղատնտեսական սպասարկման կենտրոնները հիմնականում ուղղված են բուսաբուծության, անասնապահության զարգացմանը:
Նորապատի կենտրոնը այգեգործական երկրորդ կենտրոնն է Հայաստանում՝ Դարակերտից հետո: «Կենտրոնները ոչ միայն զբաղվելու են գործիքների, պապարտանյութերի և բուժանյութերի վաճառքով, այլ նաև ուսուցողական կենտրոններ են դառնալու տեղի ֆերմերների համար: Օտարերկրյա լավագույն մասնագետները կներկայացնեն նորագույն տեխնոլոգիաների ներդրումներն ու ձեռքբերումները, նախատեսվել է նաև վարկերի տրամադրում գյուղացիական տնտեսություններին»,- ասաց գյուղնախարար Սերգո Կարապետյանը:
Փորձի փոխանակման միջոցով Հայաստանի գյուղատնտեսության մեջ արդեն կիրառվում են նորագույն տեխնոլոգիաները՝ կաթիլային ոռոգման համակարգերի և կարկտահարության պաշտպանիչ ցանցերի ներդրմամբ, որոնք ավելի արդյունավետ են:
ՀՀ-ում ԱՄՆ դեսպան Ռիչարդ Միլսը նկատեց, որ գյուղատնտեսությամբ զբաղվողներն ավելի արդյունավետ տնտեսվարողներ են և ԱՄՆ կառավարությունը տարբեր ծրագրերով օժանդակելու է գյուղատնտեսության զարգացմանը:
Նոր տեխնոլոգիաներից առաջիկայում կներդրվի նաև խոտի աճեցման հիդրոպոնիկ եղանակը, որը կիրականացվի ձմռանը՝ փակ տարածքներում: Մեթոդն առայժմ փորձարկվում է այծաբուծարանում: Մասնագետները նպատակարամար են գտել այն կիրառել Արարատյան հարթավայրումը, որտեղ արոտները քիչ են:
Նորագույն տեխնոլոգիաներով ջերմոցներում կաճեցվեն նաև ծիրանենին ու կեռասենին: Նորապատի գյուղատնտեսական սպասարկման կենտրոնի պատասխանատու Սիմոն Ասատրյանը նշեց, որ իրենք խորհրդատվությամբ պատրաստ են աջակցել գյուղացիներին և տրամադրել անհրաժեշտ նյութեր ու սարքավորումներ:
