Լուսինե Ավանեսյան
«Ռադիոլուր»- Ստեփանակերտ
Այսօր առավոտյան ժամը ութին Արցախում՝ 279տեղամասերում, որոնցից մեկը գործում է Երևանում՝ ԼՂՀ մշտական ներկայացուցչությունում, մեկնարկեցին ԼՂՀ ԱԺ ընտրությունների քվարկությունը։ Ընտրություններին հետևում են ավելի քան 100 դիտորդներ արտերկրից: Օտարերկրյա պետական և միջազգային մի շարք կառույցներ սակայն միանշանակ չեն արտահայտվել այս ընտրությունների կապակցությամբ, ինչին Արցախից արձագանքել են, թե խորհրդարան ըննտրում են ոչ թե օտարների, այլ իրենց համար:
Այսօր արցախյան ընտրությունների արդյուննքերի՝ օտարների կողմից ճանաչել-չճանաչելու վերաբերյալ հայտարարություններին արձագանքել է նաև Արցախի նախագահ Բակո Սահակյանը: Նախագահի խոսքով՝՝ընտրությունները նախատեսվել են քաղաքակիրթ աշխարհի կողմից հռչակած կանոնների համաձայն, եւ եթե միջազգային հանրությունը դրանց արդյունքները չի ճանաչում, դա դեռ չի նշանակում, որ Արցախում ևս չեն կարեւորում դրանք:
Բակո Սահակյանը տիկնոջ հետ քվերակել է օրվա առաջին կեսին Ստեփանակերտի թիվ 3 ընտրատարածքի 3-րդ ընտրատեղամասում:
2015 թվականի խորհրդարանական ընտրություններն Արցախի համար շրջադարձային են այն առումով, որ նորընտիր խորհրդարանն աշխատելու է մշտական հիմունքներով: Խորհրդարանի անդամների թիվը չի փոխվելու: ԼՂՀ Աժ-ն ունենալու է 33 պատգամավոր, սակայն փոխվելու է կուսակցական մանդատների թիվը. 22 պատգամավոր խորհրդարան է անցնելու համամասնական ընտրակարգով: Այդ մանդատների համար պայքարում է 7 կուսակցություն, իսկ 11 մեծամասնական մանդատները վիճարկում են 42 թեկնածուներ:
Առավոտյան Ստեփանակերտի տարբեր ընտրատեղամասերում քվեարկել են նաև գործող խորհրդարանի և կառավարության ղեկավարները: ԱԺ նախագահ Աշոտ Ղուլյանը և վարչապետ Արա Հարությունյանն այս ընտրություններում մրցակիցներ են և գլխավորում են Արցախի ժողովրդավարական և «Ազատ հայրենիք» կուսակցությունների ցուցակները: Մյուս իշխանական կուսակցության՝ ՀՅԴ ներկայացուցիչ Վահրամ Բալայանը նշում է, որ ապագա խորհրդարանում իրենք, հավանաբար, ավելի մեծ թիվ կկազմեն։ Կոմկուսի առաջնորդ Հրանտ Մելքումյանն ապագա խորհրդարանի մասին խոսելը վաղ է համարում: Քաղաքական դաշտի նորեկի՝ «Խաղաղություն և զարգացում» կուսակցության ներկայացուցիչ Վարուժան Գաբրիելյանը կարծում է, որ իրենց ցուցակի առաջին երեք թեկնածուները կշահեն ընտրողի վստահությունը՝ անձնական որակների շնորհիվ։
Ընտրությունների նախնական արդյունքները հայտնի կլինեն վաղը։
